اسلام آباد: وفاقی حکومت نے نفرت انگیز و مذہبی اشتعال انگیز مواد کی روک تھام کیلئے سوشل میڈیا کی مانیٹرنگ سخت کرنے کا حکم دے دیا۔ تفصیلات کے مطابق وفاقی حکومت نے نفرت انگیز و مذہبی اشتعال انگیز مواد کی روک تھام کیلئے سوشل میڈیا کی کڑی نگرانی کا فیصلہ کرتے ہوئے چاروں صوبوں سمیت آزاد کشمیر ،بلتستان کے چیف سیکرٹریز اور آئی جی پولیس کومراسلہ ارسال کردیا۔
وزارت داخلہ کے جوائنٹ سیکرٹری فیٹف کی جانب سے جاری مراسلے میں کہا گیا ہے کہ سوشل میڈیا پر نفرت انگیز مواد کی گردش اور مذہبی اشتعال انگیزی کے واقعات میں اضافہ ہوا ہے، ایسی سرگرمیاں ملک میں فرقہ وارانہ تقسیم کو ظاہر کرتی ہیں ،اس سے اشتعال انگیزی کے واقعات میں اضافے کا خدشہ ہے۔
مراسلے میں کہا گیا ہے کہ ملک کو سوشل میڈیا پر گردش کرنیوالے نفرت انگیز اور گستاخانہ مواد کے باعث عسکریت پسندی کی نئی لہر کا سامنا ہے، موجودہ صورتحال کے پیش نظر ملک کسی بھی فرقہ وارانہ انتشار کا متحمل نہیں ہو سکتا۔
بیان میں ہدایت کی گئی ہے کہ سوشل میڈیا وعسکریت پسندی سے وابستہ تمام فرقہ وارانہ تنظیموں و منسلک عناصر سمیت شعلہ بیان مقررین کی کڑی مانیٹرنگ یقینی بنائی جائے۔بیان میں کہا گیا ہے کہ محرم الحرام کے دوران شعلہ بیان مقررین پر اضلاع میں داخلے ،بیان پر پابندی عائد کر کے متعلقہ اضلاع تک محدود رکھا جائے۔
مراسلے میں ہدایت کی گئی ہے کہ سوشل میڈیا پر نفرت اور اشتعال انگیز مواد کی گردش روکنے کیلئے سائبر سپیس کی بھی سختی سے مانیٹرنگ کی جائے۔
