چین کے مشرقی صوبے شان ڈونگ کے شہر چھنگ ڈاؤمیں چھنگ ڈاؤ بندرگاہ کے کنٹینر ڈاک پر مال بردار جہاز لنگر انداز ہیں-(شِنہوا)
کوالالمپور(شِنہوا)چینی نائب وزیر خارجہ سن وے ڈونگ نے ایک وفد کی قیادت کرتے ہوئے ملائیشیا کے شہر پینانگ میں آسیان-چین، جاپان، جمہوریہ کوریاسربراہ اجلاس ، مشرقی ایشیا سربراہ اجلاس اور آسیان علاقائی فورم کے سینئر حکام کے اجلاسوں میں شرکت کی جو منگل سے بدھ تک جاری رہے۔
سن وے ڈونگ نے اجلاسوں کے بعد میڈیا کو بتایا کہ اس سال مشرقی ایشیا تعاون کا مرکزی موضوع "شمولیت اور پائیداری” تھا، جو علاقائی ممالک کی مشترکہ خواہش کی عکاسی کرتا ہے کہ وہ تعاون میں متحد رہیں، کھلے پن اور جامعیت کو برقرار رکھیں، مسائل کا مشترکہ طور پر سامنا کریں اور مشترکہ ترقی کی راہ پر گامزن ہوں۔
سن نےکہا کہ چین نے متعلقہ امور پر اپنے اصولی موقف کی وضاحت کی، امریکہ کے حملوں، بہتان تراشیوں اور بلاجواز الزامات کو سختی سے مسترد کیا اور ان کا بھرپور جواب دیا۔
چینی نائب وزیر خارجہ نے کہا کہ مشرقی ایشیا کے سینئر حکام کے اجلاسوں میں مختلف شعبوں میں عملی تعاون کو مضبوط بنانے، علاقائی اقتصادی انضمام کو آگے بڑھانے اور مشرقی ایشیا تعاون کے طریقہ کار کو فروغ دینے پر تفصیلی تبادلہ خیال کیا گیا۔
انہوں نے مزید کہا کہ اجلاسوں میں چین نے اس بات پر زور دیا کہ تمام فریقین کو تنہائی کے بجائے کھلے پن، محاذ آرائی کے بجائے تعاون، اجارہ داری کے بجائے انصاف اور اپنے فائدے کے لئے دوسرے کے نقصان کے بجائے باہمی فائدے کے نتائج کو اپنانا چاہیے۔ انہوں نے مزید کہا کہ یہ علاقائی ممالک کا مشترکہ انتخاب ہے۔
چینی سفارتکار نے کہا کہ چین تمام فریقین کے ساتھ مل کر پرامن بقائے باہمی کے 5 اصولوں کو برقرار رکھنے، بین الاقوامی تعلقات کے بنیادی اصولوں اور عالمی انصاف کو تحفظ دینے، حقیقی کثیرجہتی اور کھلے علاقائیت پر عمل پیرا ہونے، عالمی تجارتی تنظیم (ڈبلیو ٹی او) کے بنیادی ڈھانچے کے ساتھ کثیرجہتی تجارتی نظام کو برقرار رکھنے اور آسیان-مرکزی علاقائی تعاون کے ڈھانچے کی حمایت کرنے کے لئے تیار ہے۔انہوں نے کہا کہ چین ایشیا کی اقدار یعنی امن، تعاون، کھلے پن اور جامعیت کی وکالت کرتا ہے اور تمام فریقین سے مطالبہ کرتا ہے کہ وہ مسائل سے نمٹنے کے لئے متحد ہوں اور ایک پرامن، محفوظ، خوشحال، خوبصورت اور دوستانہ گھر کی مشترکہ تعمیر کریں۔
