ستھرا پنجاب اتھارٹی نے صفائی نظام کو موثر بنانے کیلئے اتھارٹی و ماتحت ایجنسیز کا تنظیمی ڈھانچہ تیار کر لیا ،41 اضلاع میں قائم ایجنسیز کو یکم فروری کو فعال کر کے ڈپٹی کمشنرز کے حوالے کر دیا جائے گا۔
ذرائع کے مطابق تنظیمی ڈھانچے کے تحت ستھرا پنجاب اتھارٹی میں ڈائریکٹر جنرل کی سیٹ کو فعال کیا گیا ہے جبکہ 3 ایڈیشنل ڈی جی، 17 ڈائریکٹرز، 16 ڈپٹی ڈائریکٹرز اور 38 اسسٹنٹ ڈائریکٹرز تعینات کئے جائیں گے۔
تنظیمی ڈھانچے کے تحت 41 اضلاع میں 41 مینیجنگ ڈائریکٹرز، 41 ڈپٹی ڈائریکٹرز، 205 اسسٹنٹ ڈائریکٹرز اور 205 تحصیل مینیجرز تعینات کئے جائیں گے، نان کارپوریٹ سٹاف کے طور پر 2189 فیلڈ مانیٹرنگ افسران جبکہ 41 مانیٹرنگ افسران کی تعیناتی بھی عمل میں لائی جائے گی۔
ذرائع ک مطابق ستھرا پنجاب اتھارٹی کے ذمہ داران سیکرٹری بلدیات پنجاب کے ماتحت ہوں گے، جبکہ اضلاع میں سالڈ ویسٹ کے ذمہ داران ڈپٹی کمشنرز کے ماتحت کام کریں گے، مالی اختیارات کے تحت اتھارٹی کا بجٹ سیکرٹری لوکل گورنمنٹ پنجاب منظور کرے گا جبکہ اضلاعی ایجنسیز کا سالانہ بجٹ متعلقہ ڈپٹی کمشنرز کی منظوری سے پاس کیا جائے گا۔
ذرائع کے مطابق نئے نظام کے نفاذ سے صوبے بھر میں صفائی انتظامات مزید موثر، شفاف و مربوط بنائے جا ئینگے۔
