امریکی صدر ڈونلڈ ٹرمپ نے کیوبا کو دھمکی دیتے ہوئے کہا ہے کہ اس سے وینزویلا کا تیل یا پیسہ نہیں ملے گا انہوں نے کیوبا پر دبائو بڑھاتے ہوئے مطالبہ کیا ہے کہ واشنگٹن کیساتھ معاہدہ کریں۔
امریکی صدر نے ٹرتھ سوشل میں لکھا کہ کیوبا کو مزید تیل یا پیسہ نہیں جائیگا، زیرو، میں سختی کیساتھ معاہدے کی تجویز دے رہا ہوں، اس سے پہلے کہ دیر ہوجائے۔
انہوں نے کہا کہ کیوبا کئی برسوں سے بڑے پیمانے پر وینزویلا سے آنیوالے تیل اور پیسوں پر جی رہا ہے، انہوں نے کیوبا کو یہ واضح نہیں کیا کہ وہ کس طرح کا معاہدہ چاہتے ہیں۔
دوسری جانب کیوبا کے صدر میگوئیل ڈیاز کینل نے ڈونلڈ ٹرمپ کی دھمکی کو مسترد کرتے ہوئے کہا ہے کہ امریکا کے پاس کوئی اخلاق جواز نہیں ہے کہ کیوبا کو معاہدے کیلئے مجبور کرے۔
سماجی رابطے کی ویب سائٹ ایکس پر جاری بیان میں انہوں نے کہا کیوبا ایک آزاد اور خودمختار ریاست ہے، کوئی ہمیں ڈکٹیٹ نہیں کرسکتا ہے کہ ہمیں کیا کرنا چاہئے، کیوبا نے حملہ نہیں کیا بلکہ اس پر 66 برس سے امریکا کی جانب سے حملہ کیا جا رہا ہے اور یہ دھمکی نہیں دیتا بلکہ تیاری کرتا ہے، خون کے آخری قطرے تک مادر وطن کے دفاع کیلئے تیار ہیں۔
