امریکی ریاست کیلیفورنیا میں کم عمر ماں کو اپنے دو کمسن بچوں کو شدید گرمی میں گاڑی میں چھوڑنے کے باعث قتل کے الزام کا سامنا ہے جس میں ایک سالہ بچہ چل بسا تھا، استغاثہ کے مطابق 29 جون کو20 سالہ مایا ہرنینڈیز نے بیکرز فیلڈ کے ایک پارکنگ لاٹ میں اپنی گاڑی میں ایک سالہ امیلیو گٹیریز اور دو سالہ میٹیو کو چھوڑ کر تقریبا ڈھائی گھنٹے ایک میڈ اسپاکے اندر گزارے جہاں وہ لپ انجکشن کروانے گئی تھی انکا علاج صرف 20 منٹ میں مکمل ہوا، مگر وہ مزید وقت اندر رہ کر گفتگو کرتی رہی، اسپاکے ملازمین اور دوستوں نے بچوں کی دیکھ بھال کی پیشکش بھی کی مگر ہرنینڈیز نے بچوں کو گاڑی میں ہی چھوڑنے کا فیصلہ کیا وہ جب شام میں گاڑی تک واپس پہنچی تو گاڑی کے اندر درجہ حرارت 46 ڈگری تک تھا امیلیو کو بیہوشی کی حالت میں ہسپتال لے جایا گیا جہاں وہ دم توڑ گیا جبکہ اسکا بھائی میٹیو زندہ بچ گیا۔
دفاعی وکیل کے مطابق یہ المناک غلطی تھی لیکن ہرنینڈیز نے گاڑی کو ایئر کنڈیشنر چلا کر چھوڑا تھا بچوں کیلئے سنیکس اور فون بھی رکھا تھا، استغاثہ نے بتایا کہ متعلقہ ماڈل کی ٹویوٹا کورولا ایک گھنٹے بعد خودکار طور پر بند ہو جاتی ہے، مایا ہرنینڈیز نے مین سلاٹر اور چائلڈ کریولٹی کے الزامات تسلیم کرلئے ہیں لیکن دوسری ڈگری کے قتل کے الزام میں خود کو بیگناہ قرار دیا ہے۔
