وزیراعظم شہباز شریف نے مصنوعی ذہانت کے فروغ، نفاذ کیلئے سٹیئرنگ کمیٹی تشکیل دینے کی ہدایت کرتے ہوئے کہا ہے کہ ڈیجیٹل معیشت کے نفاذ سے مصنوعی ذہانت ملکی ترقی کو نئی بلندیوں تک لے جائے گی، ڈیٹا پروٹیکشن، پرائیویسی اور خودمختاری کو پالیسی سازی میں اولین ترجیح دی جائے۔
جاری بیان کے مطابق ہفتے کو وزیراعظم کی زیر صدارت مصنوعی ذہانت کے فروغ سے متعلق اجلاس ہوا جس میں وفاقی وزیر اقتصادی امور احد خان چیمہ، وزیر مملکت برائے خزانہ و ریلوے بلال اظہر کیانی، وزیراعظم کے معاون خصوصی بلال بن ثاقب، اعلی سرکاری افسران اور مصنوعی ذہانت کے ماہرین نے شرکت کی۔
اجلاس میں ملک میں جدید ٹیکنالوجی کے استعمال کو تیز کرنے اور ڈیجیٹل معیشت کے دائرہ کار کو وسعت دینے کیلئے کئی اہم فیصلے کئے گئے۔وزیراعظم نے کہا کہ حکومت ملکی معیشت کو جدید خطوط پر استوار کرنے کیلئے آئی ٹی اور مصنوعی ذہانت کے شعبے کو ترجیحی بنیادوں پر فروغ دے رہی ہے، ڈیجیٹل معیشت کے نفاذ سے مصنوعی ذہانت ملکی ترقی کو نئی بلندیوں تک لے جائے گی۔
انہوں نے کہا کہ مصنوعی ذہانت کو معیشت کی ترقی، صنعتی پیداوار میں اضافے، سرکاری نظام کی شفافیت اور نوجوانوں کیلئے نئے مواقع پیدا کرنے کیلئے استعمال کیا جائے۔ وزیراعظم نے ہدایت کی کہ ڈیجیٹل معیشت کے نفاذ کو مصنوعی ذہانت کے ذریعے مزید مو ثر اور تیز بنایا جائے تاکہ پاکستان خطے میں ٹیکنالوجی کے میدان میں نمایاں مقام حاصل کر سکے۔
وزیراعظم نے ہدایت کی کہ ڈیٹا پروٹیکشن، پرائیویسی اور ڈیٹا سورینیٹی جیسے پہلوئوں کو خاص طور پر مدنظر رکھا جائے۔
وزیراعظم نے مصنوعی ذہانت کے فروغ اور نفاذ کیلئے سٹیئرنگ کمیٹی تشکیل دینے کی ہدایت کی جو پالیسیوں پر عملدرآمد کی نگرانی کرے گی۔ وزیراعظم کو بتایا گیا کہ اے آئی کے نفاذ کیلئے ماہرین پر مشتمل ایڈوائزری پینل بھی قائم کیا جا رہا ہے جو تکنیکی رہنمائی فراہم کرے گا۔
وزیراعظم نے کہا کہ پاکستان نوجوان آبادی اور ٹیکنالوجی کے بڑھتے استعمال کی بدولت مستقبل میں مصنوعی ذہانت کے شعبے میں نمایاں کردار ادا کر سکتا ہے ، اس سمت میں تمام وسائل کو بروئے کار لایا جائے گا۔
