اسلام آباد: وزیراعظم شہباز شریف نے بابائے قوم قائد اعظم محمد علی جناح کو شاندار خراج عقیدت پیش کرتے ہوئے کہا ہے کہ ملک کی ترقی ،خوشحالی ،فلاح و بہبود کا راز قائداعظم کی سیاسی میراث میں پنہاں ہے، پاکستان کو ترقی یافتہ ممالک کی صف میں شامل کرنے کیلئے قوم کی اجتماعی کاوش درکار ہے، ہمیں بحیثیت قوم قائداعظم کے ایمان، اتحاد و یقین محکم اصولوں کے تحت نظام ریاست چلانے کی تجدید کرنا ہوگی۔
قائداعظم محمد علی جناح کی 77ویں برسی پر جاری پیغام میں وزیراعظم نے کہا کہ بے مثال سیاسی قیادت اور بے لوث قومی رہنمائی پر پورا ملک بابائے قوم کو خراج عقیدت پیش کرتا ہے،قائداعظم دنیا کی تاریخ کے وہ عظیم رہنماء ہیں جنہوں نے انتہائی نامساعد حالات میں اپنی سیاسی بصیرت اور قائدانہ صلاحیتوں کو بروئے کار لاتے ہوئے برصغیر کے مسلمانوں کے لئے علیحدہ وطن حاصل کیا۔انہوں نے کہا کہ قائداعظم نے برصغیر کے مسلمانوں کے سیاسی و مذہبی حقوق، معاشی و معاشرتی ترقی اور ثقافت کے تحفظ کیلئے آزاد مملکت کیلئے پر خلوص جدوجہد کی،اللہ تعالی نے قائداعظم کی قیادت میں آزادی کی جدوجہد کو بار آور کیا اور مسلمانوں کو پاکستان کی صورت میں آزاد ریاست کی نعمت سے نوازا۔
انہوں نے کہا کہ قیام پاکستان تاریخ میں اس لئے بھی منفرد اور نمایاں حیثیت رکھتا ہے کیونکہ یہ دنیا کے نقشے میں پہلی اسلامی نظریاتی ریاست ہے۔انہوں نے کہا کہ تقسیم کے وقت سامنے آنے والے بے پناہ مسائل کے باوجود جن میں لاکھوں افراد کی کی نقل مکانی، وسائل کی کمی اور انتظامی رکاوٹیں شامل تھیں، قائد اعظم نے مضبوط پاکستان کی بنیاد رکھی اور قوم میں آگے بڑھنے کا اعتماد اور حوصلہ پیدا کیا۔
انہوں نے کہا کہ بابائے قوم نے ریاست پاکستان کی بنیاد مسلمہ اصولوں پر رکھی جس میں مذہبی آزادی، یکساں بنیادی حقوق، جمہوریت اور انصاف اور تمام مذہبی اقلیتوں کے لئے برابری سر فہرست ہے۔
انہوں نے کہا کہ قائداعظم کی سیاسی میراث میں ہی پاکستان کی ترقی و خوشحالی اور فلاح و بہبود کا راز پنہاں ہے، پاکستان کو ترقی یافتہ ممالک کی صف میں شامل اور صحیح معنوں میں اسلامی فلاحی ریاست بنانے کی منزل مقصود کیلئے پوری قوم کی اجتماعی کاوش درکار ہے، پاکستان کی آئندہ آنے والی نسلوں کے لئے قائد اعظم کی تعلیمات و رہنمائی پہنچانا بھی ہماری اجتماعی ذمہ داری ہے۔
انہوں نے کہا کہ آج کا دن اس بات کا متقاضی ہے کہ ہم بحیثیت قوم قائداعظم کی مدبرانہ سیاسی رہنمائی، نظریاتی اصول اور ایمان، اتحاد اور یقین محکم کے تحت نظام ریاست چلانے کا تجدید عہد کریں، دعاء ہے اللہ تعالی بانی پاکستان کے درجات بلند کرے ،ہمیں بحیثیت قوم ان کے بتائے نقش قدم پر چلنے کی توفیق عطاء فرمائے۔
