لاہور: لاہور ہائیکورٹ نے ڈیفنس کار حادثے میں 6 افراد کی ہلاکت کیس میں ملزم افنان کی درخواست ضمانت منظور کرلی۔ تفصیلات کے مطابق لاہور ہائیکورٹ میں دو رکنی بینچ نے ڈیفنس کار حادثے میں 6 افراد کی ہلاکت کیس میں ملزم افنان کی درخواست ضمانت پر سماعت ہوئی۔
درخواست گزار کے وکلا نے دلائل دیتے ہوئے کہا کہ یہ ایف آئی آر 322 کے تحت درج ہوئی ہے جس پر عدالت نے استفسار کیا دوبارہ کوئی واقعہ رونما ہوا ہے؟ جس پر وکیل نے بتایا کہ یہ اسی دن کاواقعہ ہے، اس میں 3 بیانات دیئے گئے ہیں۔
وکیل نے کہا کہ تفتیش میں افنان کے 3 دوستوں کو بیگناہ کردیا گیا، مدعی کے لگائے گئے الزامات ثابت نہیں ہوئے،وقوعہ کی جیوفینسنگ کروائی گئی جن گواہان کو شامل کیا گیا وہ موقع پر موجود نہیں تھے،گواہ زبیر غفور کے 2 بیانات جمع کرائے گئے۔
وکیل نے کہا کہ افنان کی عمر 17 سال 6 ماہ بنتی تھی جس پر عدالت نے استفسار کیا کہ کیا اسے جیونائل ڈکلیئر کیا گیا؟ جس پر وکیل نے کہا کہ جی چالان میں اسے جیونائل لکھا گیا ہے۔ وکیل نے استدعا کی کہ اگر 6ماہ میں ٹرائل شروع نہیں ہوتا توضمانت دی جائے۔
مدعی کے وکیل نے کہا کہ جس وقت ملزم نے پہلا بیان دیا حواس باختہ تھا، جب حواس بہتر ہوئے تو ضمنی بیان دیا، گواہان کے بیان کا ضمانت کیس سے تعلق نہیں۔عدالت نے مدعی کے وکیل سے مکالمہ کرتے ہوئے کہا کہ کیا ضمانت ہوا میں دی جائے گی؟، جوشواہد موجود ہیں انہی کی روشنی میں ضمانت پر فیصلہ ہوتا ہے۔
عدالت کو بتایا گیا کہ ملزم نے گاڑی کو صرف ٹکر نہیں ماری بلکہ اس نے نیت سے ٹکر ماری، عام ایکسیڈنٹ میں گاڑی 55 فٹ دور تک نہیں گرتی، گاڑیوں کی فارنزک رپورٹ آنا ابھی باقی ہے۔
سرکاری وکیل نے عدالت کو بتایا کہ جیونائل کیلئے میڈیکل بورڈ تشکیل دے دیا گیا ہے، جب میڈیکل بورڈ کی رپورٹ آجائے گی تب ضمانت پر فیصلہ کرلیا جائے، جیوفینسنگ کی رپورٹ بھی واضح نہیں ہے۔بعد ازاں عدالت نے ملزم افنان کی درخواست ضمانت منظور کرلی۔
