کراچی: چیئرمین پیپلزپارٹی بلاول بھٹو نے قائد اعظمؒ کے نظریات سے از سر نو رجوع کرنے کی ضرورت پر زور دیتے ہوئے کہا ہے کہ ملک کو درپیش چیلنجز سے نمٹنے،خوشحال ومتحد پاکستان کیلئے قائد کے اصول اہمیت کے حامل ہیں،ایسے پاکستان کی تعمیر کے مشن کو جاری رکھیں گے جہاں ہر شہری کو یکساں مواقع حاصل ہوں۔
تفصیلات کے مطابق قائداعظم محمد علی جناحؒ کی 76 ویں برسی کے موقع پر اپنے پیغام میں چیئرمین پیپلز پارٹی بلاول بھٹو نے قائداعظمؒ کو خراج عقیدت پیش کرتے ہوئے کہا کہ ملکی ترقی، اتحاد اور استحکام کیلئے قائداعظمؒ کے وژن اور قیادت کی اہمیت دائمی ہے، قائد کی جدوجہد، عزم اور جمہوری اصولوں سے گہری وابستگی نے مضبوط، آزاد اور خودمختار پاکستان کی بنیاد رکھی۔
انہوں نے کہا کہ قائد اعظمؒ کی جدوجہد صرف ایک الگ وطن کے قیام کیلئے نہیں تھی، بلکہ منصفانہ اور مساوی ریاست کیلئے تھی، ایسی ریاست جہاں قانون کی حکمرانی ہو اور ہرشہری کو مذہب، نسل یا طبقہ سے بلاامتیاز یکساں حقوق حاصل ہوں۔
انہوں نے کہا کہ ہمیں قائد کے نظریات سے ازسرنورجوع کرنے کی ضرورت ہے، ملک کو درپیش چیلنجز سے نمٹنے،خوشحال ومتحد پاکستان کیلئے قائد کے اصول انتہائی اہمیت کے حامل ہیں، شہید بھٹو اور شہید بینظیر بھٹو نے قائداعظمؒ کے وژن کو آگے بڑھانے کیلئے بھرپور کردار ادا کیا۔
انہوں نے کہا کہ شہید بھٹو نے 1973ء کے آئین کے ذریعے پاکستان کو ایک مضبوط بنیاد فراہم کی، شہید بھٹو نے جوہری دفاع کی بنیاد رکھی جس سے قوم کی خودمختاری اور دفاع کو یقینی بنایا گیا جبکہ شہید بینظیر بھٹو نے اپنے والد کے نقش قدم پر چلتے ہوئے جمہوریت کو مضبوط کیا۔
انہوں نے کہا کہ قائداعظمؒ نے پسماندہ طبقات کے حقوق کا تحفظ کیا اور عوام کو بااختیار بنایا۔ انہوں نے کہا کہ ہم ایسے پاکستان کی تعمیر کے مشن کو جاری رکھیں گے جہاں ہر شہری کو یکساں مواقع حاصل ہوں۔ انہوں نے کہا کہ ہم ایسا پاکستان بناکر دم لیں گے جہاں انصاف کی بالادستی ہو اور جمہوری اقدار کی پاسداری کی جائے۔
انہوں نے کہا کہ قوم اتحاد، رواداری اور اجتماعی ترقی کیلئے جدوجہد کرکے قائد اعظمؒ کی میراث کا احترام کرے۔
