پاکستان میں تاجکستان کے ڈپٹی ہیڈ آف دی مشن سعید جان شفیع زادہ اسماعیل سیڈجون پاکستانی کھانوں اور قوالی کے عاشق نکلے۔
انہوں نے کہا کہ اسلام آباد جدید شہر اور لاہور ثقافت کا گہوارہ ہے، پاکستانی کھانوں اور قوالی کا عاشق ہوں، بریانی حلوہ اور بار بی کیو کا کوئی جواب نہیں، راحت فتح علی خان کی قوالی اور صوفی کلام پر جھوم اٹھتا ہوں۔
انہوں نے کہا کہ تاجکستان اور پاکستان کے مابین تعلقات ایک دوسرے کیساتھ محبت اخوت بھائی چارے پر مشتمل ہیں، ہماری حکومت اور عوام پاکستان کیساتھ دوستی کو فخر سے دیکھتی ہے، دونوں ممالک کے درمیان ترجیحی تجارتی معاہدہ (پی ٹی اے) طے پانے کے قوی امکانات موجود ہیں، آنیوالے برسوں میں پاکستان اور تاجکستان کے درمیان دوطرفہ تجارت کا حجم 300 ملین ڈالر تک پہنچ سکتا ہے۔
انہوں نے کہا کہ تاجکستان اور پاکستان کے درمیان براہِ راست پروازوں کے حوالے باقاعدہ بحالی کیلئے بات چیت جاری ہے جس سے تجارتی سرگرمیوں کو فروغ ملے گا، پاکستان ان اولین ممالک میں شامل تھا جنہوں نے تاجکستان کی آزادی کو تسلیم کیا ۔
