اسلام آباد کے سیکٹر جی سیون ٹو میں سلنڈر دھماکہ ہو گیا جس سے دولہا اور دلہن سمیت 6 افراد جاں بحق اور 11 افراد زخمی ہو گئے، 4 گھر مکمل تباہ ہو گئے۔
ایڈیشنل ڈپٹی کمشنر جنرل کے مطابق گیس سلنڈر کے دھماکے کے نتیجے میں متعدد گھر متاثر ہوئے، گھروں سے مجموعی طور پر 16 افراد کو باہر نکالا گیا، ریسکیو کیے گئے 16 افراد میں سے 6 افراد جاں بحق ہوگئے، 11 زخمی افراد کو فوری ہسپتال منتقل کیا گیا، واقعہ کے بعد پمز ہسپتال ہائی الرٹ ہے اور زخمیوں کی طبی امداد کا سلسلہ جاری ہے، تمام افراد کو ریسکیو کر لیا گیا ہے۔
انہوں نے بتایا کہ سلنڈر دھماکہ شادی والے گھر میں ہوا، دولہا اور مہمان بھی گھر میں موجود تھے، جاں بحق ہونے والوں میں دولہا، دولہا کی والدہ اور دلہن بھی شامل ہیں، جدید ٹیکنالوجی کی مدد سے ملبے کی چیکنگ کی جا رہی ہے، انکے مطابق دھماکے کی وجوہات کے حوالے سے تحقیقات کا آغاز بھی کر دیا گیا ہے، علاقے میں سلنڈر کے استعمال معمول ہے، بلڈنگ کنٹرول ڈیپارٹمنٹ کو بھی طلب کر لیا ہے، پولیس کے ذریعے تمام راستے بند کر دیئے گئے ہیں۔
ترجمان پمز ڈاکٹر انیزہ جلیل نے کہا ہے کہ ای ڈی کی ہدایت پر پمز میں ایمرجنسی نافذ کردی گئی ہے، 6 جاں بحق افراداور 11 زخمیوں کو پمز ہسپتال لایا گیا، زخمیوں میں دو بچے بھی شامل ہیں، آرتھو پیڈک، برن سنٹر اور نیورو ڈیپارٹمنٹ میں زخمیوں کا علاج جاری ہے، دھماکے کے زخمیوں کو چھت گرنے سے زیادہ زخم آئے۔
