الیکشن کمیشن نے وزیراعلی بلوچستان کی بلدیاتی انتخابات ملتوی کرنے کی اپیل مسترد کرتے ہوئے واضح کیا ہے کہ انتخابات مقررہ شیڈول کے مطابق ہی ہوں گے، حکومت فول پروف سیکیورٹی انتظامات یقینی بنائے۔
الیکشن کمیشن کی جانب سے جاری تحریری فیصلے میں کہا گیاہے کہ وزیراعلی بلوچستان کی جانب سے بلدیاتی انتخابات ملتوی کرنے کی درخواست جمع کرائی گئی تھی جسے مسترد کر دیاگیا ہے، انتخابات مقررہ شیڈول کے مطابق 28 دسمبر کو ہی منعقد ہونگے۔
الیکشن کمیشن نے آرٹیکل 220کے تحت صوبائی حکومت کو بلدیاتی انتخابات کیلئے مکمل معاونت فراہم کرنے اور فول پروف سیکیورٹی انتظامات یقینی بنانے کا حکم دیا ہے۔
ممبر بلوچستان شاہ محمد جتوئی نے اختلافی نوٹ لکھا ہے کہ سخت موسمی حالات اور سیکیورٹی صورتحال کے باعث ووٹر ٹرن آئوٹ کم رہنے کا خدشہ ہے۔
انہوں نے سفارش کی کہ حالات بہتر ہونے تک بلدیاتی انتخابات ملتوی کئے جائیں ۔
