اسلام آباد: سربراہ جے یو آئی (ف)مولانا فضل الرحمن نے دوحا میں اسرائیلی حملے کو مسلم و عرب دنیا کی خود مختاری پر حملہ قرار دیتے ہوئے کہا ہے کہ امت مسلمہ حماس کیساتھ کھڑی ہے، فلسطینی مجاہدین، عوام کی قربانیاں رائیگاں نہیں جانے دی جائینگی، زمینی لڑائی سے خوفزدہ اسرائیل فضائی بمباری کر رہا ہے، او آئی سی فلسطین و مسجد اقصی کی آزادی کی تحریک موثر انداز میں جاری رکھنے کیلئے فوری خالد مشعل و دیگر حماس رہنمائوں کو تحفظ فراہم کرے۔
جاری بیان میں مولانا فضل الرحمن نے قطر کے دارالحکومت دوحا پر اسرائیلی حملے کی شدید الفاظ میں مذمت کرتے ہوئے کہا کہ پاکستان کے عوام، جے یو آئی کی قیادت اور کارکنان حماس قیادت پر دوحا میں کئے گئے بزدلانہ حملے کی سخت اور واضح الفاظ میں مذمت کرتے ہیں، یہ حملہ دراصل مسلم اور عرب دنیا کی خود مختاری پر حملہ ہے۔
انہوں نے کہا کہ حماس قیادت امریکی صدر کی جانب سے پیش کی گئی جنگ بندی پیشکش پر بات چیت کیلئے جمع تھی جسے نشانہ بنایا گیا تاہم تاہم اطلاعات ہیں کہ حماس رہنما ء خالد مشعل سمیت دیگر قیادت محفوظ رہی ہے۔
انہوں نے کہا کہ کارروائی میں مغربی فضائیہ کے انٹیلی جنس اور ایندھن بھرنے والے طیارے بھی استعمال کئے گئے ہیں۔ انہوںنے کہا کہ ہم حماس قیادت کیلئے دعاء گو ہیں اور واضح کرتے ہیں کہ امت مسلمہ فلسطینی عوام کے جائز مقصد کی حمایت سے پیچھے نہیں ہٹے گی۔ انہوں نے کہا کہ ہزاروں فلسطینی اپنی جانیں قربان کرچکے ہیں جبکہ غزہ اور مغربی کنارے کے مجاہدین قابض اسرائیلی افواج کو اب بھی زمینی محاذ پر بھاری نقصان پہنچا رہے ہیں، اسرائیلی افواج اپنی کمزوری کے باعث صرف فضائی حملوں پر انحصار کرتی ہیں اور معصوم شہریوں، خواتین، بچوں اور بزرگوں پر بمباری کرتی ہیں۔
انہوں نے کہا کہ مہینوں سے غزہ کے عوام خوراک اور پانی کی شدید ناکا بندی اور محاصرے کا سامنا کر رہے ہیں جس کے باعث بھوک سے ہلاکتیں بڑھتی جا رہی ہیں۔ انہوں نے کہا کہ ہم تیونس میں جمع گلوبل صمود فلوٹیلا کے کارکنان کی بھی مکمل حمایت کرتے ہیں۔
انہوں نے کہا کہ اسرائیل نے ان پر بھی ڈرون حملہ کر کے ان کی حوصلہ شکنی کی کوشش کی ،خوراک اور پانی کا محاصرہ کھلا جنگی جرم ہے۔قائد جمعیت نے کہا کہ مسلمان ممالک کی خاموشی اور بے عملی کی وجہ سے صورتحال روز بروز سنگین ہو رہی ہے تاہم واضح کردیںہم فلسطینی عوام کے ساتھ پہلے کی طرح ڈٹ کر کھڑے ہیں اور ہمارا عزم ہے کہ مسجد اقصی اور فلسطین کو اسرائیل کے ناجائز قبضے سے آزاد کرایا جائے گا۔
انہوں نے کہا کہ فلسطینی عوام کی قربانیاں کبھی رائیگاں نہیں جانے دی جائیں گی ۔ انہوں نے مطالبہ کیا کہ او آئی سی فوری خالد مشعل و دیگر حماس رہنمائوں کو مکمل تحفظ فراہم کرے تاکہ وہ فلسطین اور مسجد اقصی کی آزادی کی تحریک کی قیادت موثر انداز میں جاری رکھ سکیں۔
