لاہور: پنجاب کے 15 اضلاع میں انسداد پولیو مہم کامیابی سے جاری ہے، مہم کے پہلے روز 38 لاکھ بچوں کو ویکسین کے قطرے پلائے گئے۔ تفصیلات کے مطابق پنجاب کے 15 اضلاع میں انسداد پولیو مہم کامیابی سے جاری ہے، لاہور، فیصل آباد، راولپنڈی میں مہم 15 ستمبر جبکہ دیگر 12 اضلاع اٹک، بہاولپور، بہاولنگر، چکوال، ڈی جی خان، گوجرانوالہ، ملتان، مظفر گڑھ، اوکاڑہ، راجن پور، رحیم یار خان اور شیخوپورہ میں مہم 13 ستمبر تک جاری رہے گی۔
مہم کے پہلے روز 38لاکھ بچوں کو ویکسین کے قطرے پلائے گئے۔اس حوالے سے چیف سیکرٹری پنجاب زاہد اختر زمان کی زیر صدارت ڈپٹی کمشنرز کا ویڈیو لنک اجلاس ہوا جس میں صوبے میں جاری انسداد پولیو مہم کا جائزہ لیا گیا۔ محکمہ صحت کے حکام نے انسداد پولیو مہم بارے بریفنگ دیتے ہوئے بتایا کہ پنجاب میں انسداد پولیو مہم کے دوران ایک کروڑ 39 لاکھ بچوں کو ویکسین کے قطرے پلائے جائیں گے۔ اجلاس کو بتایا گیا کہ مہم کی مانیٹرنگ کیلئے ٹیمیں تشکیل دی گئی ہیں۔
