اسلام آباد: وزیر اعظم محمد شہباز شریف نے کہا ہے کہ طالبعلم اکرام اللہ کاکڑ کا خاندان سیلاب سے شدید متاثر تھ، میں اکرام اللہ کو لارنس کالج لے آیا۔ ان خیالات کا اظہار انہوں نے بلوچستان کے طالب علم اکرام اللہ کاکڑ سے ملاقات کے دوران کیا۔
وزیر اعظم نے کہا کہ 2022 میں دورہ قلعہ سیف اللہ کے دوران اکرام اللہ سے امدادی خیمے میں ملاقات ہوئی تھی، ملاقات میں اکرام اللہ نے اعلی تعلیم حاصل کرنے کی خواہش کا اظہار کیا تھا اور ان کے تعلیمی اخراجات براداشت کرنے کا اعلان کیا تھا، آج یہ دیکھ کر خوشی ہے کہ اکرام اللہ محنت سے اپنے اہداف کی طرف گامزن ہے۔
وزیر اعظم نے اکرام اللہ کو یاد دلایا کے گزشتہ ملاقات میں آپ نے سیاہ رنگ کی شلوار قمیض پہنی ہوئی تھی ، مجھے اچھی طرح یاد ہے کہ اس دن بہت چمکتی دھوپ تھی اور آپ نے کہا تھا کہ ہمارے علاقہ میں کوئی سکول نہیں، بچوں کو تعلیم کے حصول کیلئے بہت دور جانا پڑتا ہے۔
مجھے تعلیم حاصل کرنے کا بڑا شوق ہے ۔وزیر اعظم نے کہا کہ پھر میں اکرام اللہ کو لارنس کالج لے آیا ۔ انہوں نے کہا کہ گزشتہ روز جب میں نے یہ خبر پڑھی کہ آپ نے تیسری پوزیشن حاصل کی ہے تو مجھے بہت فخر محسوس ہوا ۔ وزیر اعظم نے کہاکہ آپ کے اساتذہ اور والدین کی دعائیں اور آپکی محنت رنگ لائی ہے ۔ انہوں نے کہا کہ میں سمجھتا ہوں کے یہ بہت خوشی کی بات ہے جس پر اللہ تعالی کا شکر ادا کرنا چاہئے۔ وزیر اعظم محمد شہباز شریف نے طالب علم سے گفتگو کرتے ہوئے کہاکہ یہ سب اللہ تعالی کا کرم ہے ، وہ انسانوں کو ذریعہ بنا دیتا ہے ، مجھے اللہ تعالی نے توفیق دی اور آپ کیلئے ذریعہ بنایا ۔
انہوں نے کہا کہ آج آپ ایک بہترین ادارے میں تعلیم حاصل کر رہے ہیں جو اللہ تعالی کاکرم ہے ۔ آپ نے بہت محنت کی ہے ، اس کالج نے بہت بڑے بڑے نام پیدا کئے ہیں ۔ اس موقع پر وزیر اعظم محمد شہباز شریف نے طالبعلم اکرام اللہ کو خصوصی تحفہ بھی پیش کیا اور کہا کہ یہ تحفہ مستقبل میں آپ کی پڑھائی اور عملی زندگی میں بھی کام آئے گا ۔ اس موقع پر اکرام اللہ نے کہا کہ پچھلی مرتبہ میں نے آپ سے پوزیشن حاصل کرنے کا وعدہ کیا تھا جو میں نے پورا کیا اور آپ سے ملاقات کیلئے آیا ہوں ۔
طالب علم اکرام اللہ نے وزیر اعظم سے اظہار تشکر کیا اور کہا کہ لوگ سیاست میں ہر کسی کیلئے کچھ نا کچھ کرتے ہیں لیکن آپ کا رویہ میرے ساتھ سیاست سے ہٹ کر تھا ، آپ نے بہت ہی پسماندہ علاقے سے ایک بچہ لیا اور اس کو لارنس کالج میں تعلیم حاصل کرنے کا موقع دیا ۔ انہوں نے کہا کہ آپ نے مجھے ملک کے بہت بڑے تعلیمی ادارے میں پڑھنے کا موقع دیا۔ انہوں نے کہا کہ ہمارے کالج میں ٹاپ تھری سٹوڈنٹس کو سکالر شپ ملتی ہے لیکن میں نے فیصلہ کیا کہ میں ڈبل سکالر شپ حاصل کروں گا۔ میں پہلے بھی سکالر شپ پر پڑھ رہا تھا اور الحمد اللہ میں نے محنت کی اور مجھے یہ سکالر شپ ملی ہے۔
انہوں نے کہاکہ میری کامیابی آپ کی مرحون منت ہے ۔اکرام اللہ نے کہا کہ میرے ملک کا مجھ پر بہت بڑا قرض ہے اور میں مزید محنت کرونگا اور اپنی استعداد سے بڑھ کر ملک و قوم کی خدمت کرونگا ۔ وزیر اعظم نے مستقبل کے حوالے سے سوال کیاتو اکرام اللہ نے کہاکہ میں سی ایس ایس کرنا چاہتا ہوں اور انٹر میڈیٹ میں بھی محنت کر کے بیرون ملک سکالر شپ حاصل کرنے کی کوشش کرونگا کیونکہ مجھے بچپن سے ہی آکسفورڈ جانے کا شوق ہے۔
انشا اللہ میں ملک و قوم کا نام سربلند کرونگا ۔ انہوں نے کہا کہ میں آپ کے نقش قدم پر چلنے کی کوشش کرونگا کیونکہ آپ بھی ملک و قوم کیلئے بہت محنت کررہیہیں ۔ ہم سب طالبعلم یہ خواہش رکھتے ہیں آپ جیسا لیڈر ہمیں مستقبل میں بھی نصیب ہو۔ وزیر اعظم کے استفسار پر اکرام اللہ نے بتایا کہ میں کھیلوں کے ساتھ ساتھ تقریری مقابلوں میں بھی شرکت کرتا ہوں۔
واضح رہے کہ بلوچستان کے دور دراز علاقے سے تعلق رکھنے والا طالبعلم اکرام اللہ کاکڑ وزیر اعظم محمد شہباز شریف کی جانب سے فراہم کردہ سکالر شپ پر لارنس کالج میں تعلیم حاصل کر رہا ہے اور اس نے میٹرک کے امتحان میں راولپنڈی بورڈ میں تیسری پوزیشن حاصل کی ہے ، جس پر وزیر اعظم نے ملاقات کیلئے اکرام اللہ کو مدعو کیا تھا ۔ ملاقات میں وفاقی وزیر اطلاعات و نشریات عطا اللہ تارڑ ، اکرام اللہ کے والدین اور اساتذہ بھی موجود تھے ۔
