اسلام آباد: وفاقی حکومت نے ملازمین کا بوجھ کم کرنے کیلئے سول سرونٹس ایکٹ 1973ء میں ترمیم کی تجویز دیدی جس کے تحت ملازمین کو گولڈن ہینڈ شیک دیا جائیگا جبکہ گریڈ 1سے 5تک آسامیاں آوٹ سورس کرنے سے پنشن بل میں کمی ہو گی۔
ذرائع کے مطابق سیکرٹری اسٹیبلشمنٹ نے بتایا ہے کہ وفاقی حکومت مالی بوجھ میں کمی کیلئے کئی اداروں کو ختم کرنا چاہتی ہے، مقصد کیلئے حکومت نے سول سرونٹس ایکٹ 1973ء میں ترمیم تجویز کی ہے۔
سیکرٹری اسٹیبلشمنٹ کے مطابق ٹیکنالوجی کے دور میں زیادہ آسامیوں کی ضرورت نہیں رہی ہے، ایک افسر کیساتھ 6ماتحت کا عملہ ہوتا ہے ،ٹیکنالوجی کے بعد اسے اب صرف دو ماتحت تک محدود کیاجائے گا۔
انہوں نے بتایا کہ اٹھارہویں آئینی ترمیم کے بعد کئی کام صوبوں کو منتقل کئے گئے ہیں جس کے تحت حکومت کئی اداروں کو ختم اور کئی کا انضمام کرے گی۔
سیکرٹری اسٹیبلشمنٹ نے بتایا کہ وفاقی اداروں کے زیادہ ملازمین کو سرپلس پول میں نہیں بھیجا جاسکتا، حکومت نے ملازمین کی ملازمت سے علیحدگی کیلئے پیکیج تیار کرنے کی بھی تجویز دی ہے۔
سیکرٹری اسٹیبلشمنٹ نے بتایا کہ سرکاری ملازمین کو گولڈن ہینڈ شیک دیا جائے گا، گریڈ ایک سے 5تک کی آسامیاں آئوٹ سورس کی جائیں گی، ایسا کرنے سے پنشن بل میں نمایاں کمی ہو گی۔
