اسلام آباد: ملک بھر میں جاری شدید بارشوں کے باعث مختلف حادثات میں 9 افراد جاں بحق، متعدد زخمی ہوگئے۔
حکام کے مطابق پنجاب کے مختلف علاقوں اسلام آباد، راولپنڈی، گوجرانوالہ، فیصل آباد، سیالکوٹ اور دیگر شہروں میں وقفے وقفے سے بارش کا جاری ہے۔
موسلا دھار بارش کے باعث نشیبی علاقے زیر آب آ گئے۔ لاہور میں جمعرات کی صبح طوفانی بارش سے نظام زندگی درہم برہم ہوگیا، متعدد سڑکیں پانی میں ڈوب گئیں جبکہ ٹریفک کی روانی شدید متاثر ہوئی۔
قصور میں کرنٹ لگنے کے مختلف واقعات میں دو بچے اور ایک خاتون جاں بحق ہو گئی جبکہ دیگر علاقوں میں آسمانی بجلی گرنے اور بارش سے جڑے حادثات میں مجموعی طور پر 9قیمتی جانیں ضائع ہوئیں اور متعدد افراد زخمی ہوئے۔
حکام کے مطابق بلوچستان کے متعدد اضلاع میں بھی گرج چمک کیساتھ بارش کا سلسلہ جاری ہے، جب کہ آزاد کشمیر اور گلگت بلتستان میں شدید بارشوں کے باعث ندی نالوں میں طغیانی اور سیلابی صورتحال پیدا ہو گئی ہے۔
کراچی میں بھی رات گئے مختلف علاقوں میں بارش سے پانی سڑکوں پر کھڑا ہونے سے عوام کو پریشانی کا سامنا کرنا پڑا۔
