وزیراعلی خیبرپختونخوا سہیل آفریدی نے جدید تعلیمی نصاب کے نفاذ پر زور دیتے ہوئے کہا ہے کہ پرانے اور آؤٹ ڈیٹڈ کورسز سے بیروزگاروں کی فوج بھرتی کی جارہی ہے، خیبرپختونخوا میں مواقع نہ ہونے کی وجہ صوبے کو تجربہ گاہ بنانا ہے، اب ایسا نہیں ہوگا۔
انجینئرنگ یونیورسٹی پشاور میں کانووکیشن سے خطاب کرتے ہوئے سہیل آفریدی نے کہا کہ خیبرپختونخوا میں ٹیلنٹ کی کوئی کمی نہیں ہے مگر پرانے اور آؤٹ ڈیٹڈ کورسز سے ہم بیروزگاروں کی فوج بھرتی کر رہے تھے۔
انہوں نے کہا کہ خیبرپختونخوا میں مواقع نہیں، کیونکہ صوبے کو ہمیشہ تجربہ گاہ بنایا گیا ہے، اس بار خیبرپختونخوا کو تجربہ گاہ نہیں بننے دوں گا۔
انہوں نے کہا کہ سیاست کیلئے کسی کے در پر نہیں جاؤں گا، جہاں عوامی مفاد کی بات ہوگی وہاں بیٹھوں گا۔
انہوں نے بتایا کہ ہمارے صوبے کا پہلا مسئلہ امن وامان ہے، اس حوالے سے وزیرعظم سے ملاقات ہوئی ہے، سیکیورٹی فورسز سے بھی اسی حوالے سے آج ملاقات ہوگی۔
