پاکستان کرکٹ بورڈ نے پاکستان کی شہ رگ آزاد جموں و کشمیر میں پاکستان سپر لیگ (پی ایس ایل) کے میچز منعقد کرانے کا اعلان کرتے ہوئے کہا ہے کہ مظفر آباد کرکٹ سٹیڈیم میں پی ایس ایل میچز کا انعقاد کیا جائیگا جس کیلئے اقدامات کئے جارہے ہیں۔
یہ اعلان پی سی بی کے چیئرمین محسن نقوی نے پی ایس ایل کے تاریخی لندن روڈ شو میں کیا اور کہا کہ ہم مظفر آباد کرکٹ سٹیڈیم کو بھی بہترین انداز میں تیار کرنے جا رہے ہیں، بین الاقوامی کھلاڑیوں کیلئے مظفر آباد میں اعلیٰ معیار کا فائیو سٹار ہوٹل بھی موجود ہے۔
انہوں نے کہا کہ پی ایس ایل کے میچز کیساتھ ساتھ دیگر بین الاقوامی میچز بھی آزاد جموں و کشمیر میں منعقد کرائے جائینگے۔
انکا کہنا تھا کہ پاکستان کے خوش آئند اقدام نے ثابت کردیا ہے کہ امن، کھیل اور ترقی کشمیر کی اصل شناخت ہیں، مقبوضہ کشمیر میں بھارت کے ظلم و ستم کے برعکس پاکستان جنت نظیر وادی میں کھیل کے ذریعے امن کی تاریخ لکھ رہا ہے۔
آزاد جموں و کشمیر میں خوشگوار کھیلوں کی فضا واضح پیغام ہے کہ پاکستان ایک امن پسند ملک ہے جو ظلم و بربریت کیخلاف ہر لمحہ اپنے کشمیری بھائیوں کیساتھ ہے۔
