وزیراعظم شہباز شریف نے انسداد بدعنوانی کیلئے حکومتی اقدامات مزید موثر بنانے کے عزم کا اعادہ کرتے ہوئے کہا ہے کہ مالی بدعنوانی ملکی ترقی، معیشت اور عوامی اعتماد کو کمزور کرتی ہے، نوجوان ہمارا قیمتی اثاثہ، خوشحال و باعزت مستقبل کی ضمانت ہیں، بدعنوانی کے خاتمے میں شمولیت ناگزیر ہے۔
انسداد بدعنوانی کے عالمی دن پر جاری بیان میں شہباز شریف نے کہا کہ 2025میں یہ عالمی دن ‘نوجوانوں کیساتھ مل کر بدعنوانی کیخلاف ایماندار، باعزت مستقبل کی بنیاد’کے عنوان کے تحت منایا جارہا ہے، یہ عنوان ہمہ جہتی اور ہر عمر کی آبادی کی شمولیت سے اس برائی کے خاتمہ کرنے کی اہمیت کو اجاگر کر رہا ہے۔
وزیراعظم نے کہا کہ نوجوان ہمارا بیش قیمت اثاثہ، پرامن، خوشحال اور ترقی یافتہ مستقبل کی ضمانت ہیں۔
انہوں نے کہا کہ جدید دور میں بدعنوانی کی نوعیت، طریقہ کار تیزی سے بدل رہی ہیں اس لئے نوجوانوں کی اس کے سد باب میں شمولیت سے ناسور کو موثر انداز میں ختم کیا جا سکتا ہے۔
انہوں نے کہا کہ مالی بدعنوانی ملکی ترقی، معاشرتی تنوع اور معیشت کی بنیادوں کو کمزور کرتی اور عوامی اعتماد کو مجروح کرتی ہے۔
انہوں نے کہا کہ انسداد بدعنوانی کا عالمی دن دنیا بھر کے افراد کو یہ موقع بھی فراہم کرتا ہے کہ وہ بدعنوانی کے مضر معاشرتی اثرات کی حوصلہ شکنی اور بدعنوانی سے پاک معاشرہ تشکیل دینے کے اپنے عزم کی تجدید کریں۔
وزیراعظم نے کہا کہ مالی بدعنوانی نہ صرف ملکی انتظامیہ کو کمزور کرتی بلکہ عوام کی روزمرہ زندگی، معاشرتی انصاف و مساوات، معاشی ترقی اور فلاحی ریاست کے بنیادی اصولوں کو بھی متاثر کرتی ہے، مالی بدعنوانی کے خلاف ٹھوس اقدامات حکومت کی ترجیحات میں شامل ہے، اس ضمن میں قومی احتساب بیورو اور تمام متعلقہ ادارے بھرپور طریقے سے اور بڑی تندہی سے کارروائی کر رہے ہیں تاکہ انتظامی ، مالیاتی اور ادارہ جاتی سمیت ہر سطح پر جوابدہی کو یقینی بنایا جا سکے۔
وزیراعظم نے بتایا کہ مالی بد عنوانی کیخلاف قانونی کارروائیاں اور قومی وسائل کے تحفظ کیلئے نیب کی کاوشیں لائق تحسین ہیں ،اس تناظر میں نوجوان نسل میں انسداد بدعنوانی سے متعلق آگاہی پیدا کرنے کیلئے بھی نیب کی کاوشیں قابل تعریف ہیں۔
وزیراعظم نے کہا کہ منظم مالی جرائم کے باعث اپنی رقوم سے محروم ہونیوالے شہریوں کی بروقت داد رسی سے بھی نیب پر عوام کا اعتماد مزید مستحکم ہوا ہے۔
وزیراعظم نے کہا کہعالمی سطح پر بھی پاکستان معاشرتی برائی کے خاتمے کیلئے موثر شراکت داری کررہا ہے ، پاکستان اقوام متحدہ کے کنونشن برائے انسداد بدعنوانی کے تحت مختلف ممالک کیساتھ تعاون اور باہمی قانونی معاونت کی مفاہمتی یادداشتوں پر دستخط عالم شراکت داری کا حصہ ہیں۔
وزیر اعظم نے کہا کہ آئیے تجدید عہد کریں کہ ہم یکجہتی، مشترکہ مقصد اور شفاف، منصفانہ اور خوشحال پاکستان کے خواب کی تکمیل میں ہر ممکن اقدامات اٹھائیں گے اور وفاقی، صوبائی حکومتوں سمیت معاشرے کی سطح پر ہر طبقہ اور رہنمائوں کو شامل کر کے اس ناسور کیخلاف جدو جہد کو مزید موثر انداز میں جاری رکھیں گے۔
