آسٹریلیا نے اسرائیل اور حماس کے درمیان ہونیوالے امن معاہدے کا خیر مقدم کرتے ہوئے کہا ہے کہ اپنے شراکت داروں کے ساتھ مل کر آسٹریلیا ایک منصفانہ اور پائیدار دو ریاستی حل کے لیے اپنی کوششیں جاری رکھے گا۔
آسٹریلیا کے وزیرِاعظم انتھونی البانیز نے نے وزیرِ خارجہ پینی وونگ کے ساتھ ایک مشترکہ اعلامیے میں کہا کہ آسٹریلیا صدر ٹرمپ کے اس اعلان کا خیرمقدم کرتا ہے کہ اسرائیل اور حماس نے غزہ میں امن لانے کے منصوبے کے پہلے مرحلے پر دستخط کر دیے ہیں۔
انہوں نے کہا کہ دو سال سے زیادہ عرصے کی جنگ، یرغمالیوں کی قید اور عام شہریوں کی تباہ کن ہلاکتوں کے بعد یہ امن کی طرف ایک نہایت ضروری قدم ہے، آسٹریلیا مستقل طور پر جنگ بندی، یرغمالیوں کی رہائی اور غزہ میں امداد کے آزادانہ بہا وکے لیے عالمی مطالبات کا حصہ رہا ہے، ہم تمام فریقین پر زور دیتے ہیں کہ وہ منصوبے کی شرائط کا احترام کریں۔
انہوں نے مزید کہا کہ آسٹریلیا اس بات کی پرزور حمایت کرتا ہے کہ منصوبے میں حماس کو غزہ کی مستقبل کی حکمرانی میں کسی بھی کردار سے روکا جائے، غزہ میں بحالی کا سفر طویل ہے، وہاں دیرپا امن اور فلسطینی ریاست کے قیام کے لیے طویل المدتی کام درکار ہے ۔
