اے این ایف نے منشیات کیخلاف 7کارروائیوں میں 17کروڑ 24 لاکھ روپے سے زائد مالیت کی 637.2 کلو گرام منشیات برآمد کر کے خاتون سمیت 7 ملزمان کو گرفتار کرلیا۔
ترجمان کے مطابق فاروق اعظم چوک اٹک کے قریب گاڑی سے 1.2کلوگرام چرس برآمد ہوئی، جبکہ ڈسٹرکٹ اٹک میں کارروائی کے دوران کالج کے قریب سے 810گرام آئس برآمد کی گئی، گرفتار ملزمان نے طلباء کو منشیات فروخت کرنے کا اعتراف کیا ہے۔
ترجمان کے مطابق کاک پل اسلام آباد کے قریب گاڑی سے 4 کلوگرام ہیروئن، ویلج پاڈے لاہور کے قریب ملزم کے قبضے سے 3.318کلوگرام ہیروئن اور حاجی شاہ بس ٹرمینل اٹک کے قریب موٹر سائیکل سوار مرد و خاتون کے قبضے سے 2.4کلوگرام چرس برآمد ہوئی۔
ترجمان کے مطابق علی شہید چیک پوسٹ لاہور کے قریب کارروائی میں ملزم سے 565گرام ہیروئن، ایک ڈرون، چار بیٹریاں اور ڈراپ کٹ برآمد کی گئی۔
کراچی کے بدرالدین یارڈ میں کارروائی کے دوران افغانستان سے جاپان جانیوالی شپمنٹ سے باریک پائوڈر میں چھپائی گئی 625کلوگرام آئس برآمد ہوئی۔
ترجمان کے مطابق تمام گرفتار ملزمان کیخلاف مقدمات درج کر کے مزید تحقیقات شروع کردی گئی ہے۔
