وزیراعظم شہباز شریف نے 7خوارج جہنم واصل کرنے پر سیکیورٹی فورسز کو خراج تحسین پیش کرتے ہوئے ناسور کے مکمل خاتمے تک اس کیخلاف جنگ جاری رکھنے کے عزم کا اعادہ کیا ہے۔
جاری بیان میں وزیراعظم نے داربن میں 7خارجی ہلاک کرنے پر سیکیورٹی فورسز کی تعریف کی جبکہ جام شہادت نوش کرنے والے میجر سبطین حیدر کو خراج عقیدت پیش کیا۔
وزیر اعظم نے شہید کی بلندی درجات اور اہل خانہ کیلئے صبر جمیل کی دعاء کرتے ہوئے کہا کہ افواج پاکستان کے بہادر افسران و جوان دن رات ارض وطن کی حفاظت میں مصروف عمل ہیں، مجھ سمیت پوری قوم کو اپنی بہادر افواج کے افسران و جوانوں پر فخر ہے۔
انہوں نے کہا کہ پوری قوم افواج پاکستان کے وطن عزیز کی حفاظت کے غیر متزلزل عزم میں ان کے شانہ بشانہ کھڑی ہے۔
وزیراعظم نے کہا کہ دہشت گردی کی عفریت کے ملک سے مکمل خاتمے تک اس کے خلاف جنگ جاری رکھی جائے گی۔
