چین کے شمال مشرقی صوبے لیاؤننگ کےشہر شین یانگ میں چینی عوامی رضاکاروں (سی پی وی) کے قبرستان میں شہری شہداء کی یادگاری دیوار پر پھول رکھ رہے ہیں-(شِنہوا)
بیجنگ(شِنہوا)سابق فوجیوں کے امور کی وزارت کا کہنا ہے کہ چین ہفتہ کے روز شمال مشرقی صوبہ لیاؤننگ کے دارالحکومت شین یانگ میں کورین جنگ میں شہید ہونے والے 30 چینی عوامی رضاکار (سی پی وی) فوجیوں کی باقیات کی تدفین کے لئے ایک باقاعدہ تقریب منعقد کرے گا ۔
وزارت نے مزید بتایا کہ یہ فوجی امریکہ کی جارحیت کے خلاف مزاحمت اور کوریا کی مدد کی جنگ (1950-1953) کے دوران شہید ہوئے تھے اور ان کی باقیات جمعہ کے روز جمہوریہ کوریا (آر اوکے) سے واپس لائی جائیں گی۔
وزارت کے مطابق چینی پیپلز لبریشن آرمی (پی ایل اے) کے اعزازی گارڈز کا وفد اور پی ایل اے فضائیہ کا وائی-20 ٹرانسپورٹ طیارہ شہداء کی باقیات کو واپس لانے کے مشن میں شریک ہوگا۔
ہفتہ کو تدفین کی تقریب شین یانگ میں سی پی وی شہداء کے قبرستان میں ہوگی، جہاں مرکزی اور مقامی حکومتوں کے نمائندے، فوجی، سابق فوجی، شہداء کے اہل خانہ اور مقامی افراد شہداء کو خراج عقیدت پیش کرنے کے لئے جمع ہوں گے۔
یہ چین اور جمہوریہ کوریا کے درمیان باقیات کی حوالگی کے معاہدے پر دستخط کے بعد سی پی وی فوجیوں کی باقیات کی 12 ویں واپسی ہوگی۔
2014سے 2024 کے دوران دونوں ممالک 11 مراحل میں 981 شہداء کی باقیات اور ان سے متعلق اشیاء کی حوالگی مکمل کر چکے ہیں۔
تقریباً 2 لاکھ چینی عوامی رضاکار فوجی اس جنگ میں شہید ہوئے تھے۔
