کراچی: اداکارہ مومل شیخ نے کہا ہے کہ ہمارا خاندان پاکستانی انڈسٹری میں ویسا ہے جیسے بھارت میں کپور خاندان ہے، والد اور سلیم چاچا شہرت کے باوجود کپورز کی طرح برتاؤ نہیں کرتے۔میڈیا رپورٹ کے مطابق نجی ٹی وی کو انٹرویو دیتے ہوئے اداکارہ مومل شیخ نے کہا کہ ہمارا خاندان پاکستانی انٹرٹینمنٹ انڈسٹری میں ویسا ہی ہے جیسے بھارت میں کپور فیملی ہے۔
انہوں نے کہا کہ جاوید شیخ اور سلیم شیخ بھائی ہیں، اسی طرح بہروز سبزواری میرے پھوپھا ہیں، اگر دیکھیں تو شیخ فیملی اور سبزواری فیملی پاکستانی شوبز انڈسٹری میں اسی طرح ہیں جس طرح بالی ووڈ میں کپور فیملی ہے یہ اسی طرح کامیاب اور شہرت رکھتے ہیں۔
انہوں نے کہا کہ شہرت کے باوجود والد اور سلیم چاچا کبھی کپورز کی طرح برتاؤ نہیں کرتے، ان میں کوئی اقرباء پروری نہیں ہے،وہ کسی کو کبھی کام کیلئے کوئی کال نہیں کریں گے۔انہوں نے کہا کہ ہم نے والدین کے بل بوتے پر نہیں بلکہ انڈسٹری میں اپنی جگہ خود بنائی ہے۔
