باکو: سپیکر قومی اسمبلی ایاز صادق نے پاکستان اور آذر بائیجان کی پارلیمانوں میں روابط کو فروغ دینے کیلئے رواں سال ستمبر میں اسلام آباد میں سہ فریقی سپیکرز کانفرنس کی میزبانی کی تجویزپیش کردی۔
جاری بیان کے مطابق سپیکر قومی اسمبلی ایاز صادق کی قیادت میں پارلیمانی وفد نے آذربائیجان کے وزیر اعظم علی اسدوف سے باکو میں ملاقات کی اور ای سی او سربراہی اجلاس کے کامیاب انعقاد پر مبارکباد دی۔
سپیکر نے کہا کہ وزیراعظم شہباز شریف کی ای سی او اجلاس میں شرکت دونوں ممالک میں یکجہتی اور خیر سگالی کی علامت ہے۔
ایاز صادق نے مسئلہ کشمیر بارے پاکستان کے موقف کی غیر متزلزل حمایت پر آذربائیجان سے اظہارِ تشکر کیا جبکہ آذربائیجان کی جانب سے پاکستان میں 2ارب ڈالر کی سرمایہ کاری کے اعلان کا خیر مقدم کیا۔
ملاقات میں دونوں ممالک کے مابین ترجیحاتی تجارتی معاہدہ کے نفاذ کا خیر مقدم کیا گیا۔سپیکر قومی اسمبلی نے دونوں برادر ممالک کی پارلیمانوں میں روابط کو فروغ دینے کی ضرورت پر زور دیتے ہوئے رواں سال ستمبر میں اسلام آباد میں سہ فریقی سپیکرز کانفرنس کی میزبانی کی تجویزپیش کی۔
ملاقات میں وزیر اعظم علی اسدوف نے کشمیر پر آذربائیجان کے اصولی موقف کا اعادہ کیا اورپاکستان کی جانب سے نگورنو کاراباخ تنازعہ پر حمایت پر پاکستان کا شکریہ ادا کیا۔علی اسدوف نے کہا کہ آذربائیجان اپنی خودمختاری اور علاقائی سالمیت پر کوئی سمجھوتہ نہیں کرے گا۔
