وفاقی وزیر داخلہ محسن نقوی نے غیر قانونی امیگریشن و انسانی سمگلنگ کیخلاف بلا امتیاز کارروائیاں جاری رکھنے کا حکم دیتے ہوئے کہا ہے کہ پاکستان کے نام پر کسی صورت حرف آنے کی اجازت نہیں دے سکتے۔
جمعہ کو وزیر داخلہ محسن نقوی کی زیر صدارت ایف آئی اے امیگریشن ونگ کی کارکردگی، غیر قانونی امیگریشن و انسانی سمگلنگ روک تھام کیلئے جاری مہم کا جائزہ اجلاس ہوا جس میں پیشہ ور بھکاری مافیا کے خلاف کارروائیوں پر بھی غور کیا گیا۔
وزیر داخلہ نے غیر قانونی امیگریشن میں ملوث مافیا کے خلاف بلا امتیاز سخت کارروائی جاری رکھنے کے احکامات دیتے ہوئے کہا کہ انسانی سمگلنگ میں ملوث عناصر کسی رعایت کے مستحق نہیں، ایئرپورٹس پر امیگریشن چیکنگ کے نظام کو موثر بنایا جائے اور ایئر پورٹس پر سفری دستاویزات کی سخت سکریننگ کی جائے۔
انہوں نے واضح کیا کہ پاکستان کے نام پر کسی صورت حرف آنے کی اجازت نہیں دے سکتے۔
