پاکستان کے نامور اداکار، گلوکار، مصور اور مجسمہ ساز جمال شاہ نے بھارتی فلم انڈسٹری پر سخت تنقید کرتے ہوئے کہا ہے کہ بالی ووڈ انڈسٹری ایک بڑے فکری بحران کا شکار ہو چکی ہے، آج کل بالی ووڈ انڈسٹری ایک بھونڈے انداز میں سیاست زدہ ہو چکی ہے، مودی حکومت کا بیانیہ براہ راست فلموں میں منتقل کیا جا رہا ہے، یہ اب ایک قدامت پسند سینما بن گیا ہے جو جنگ پسندی کو فروغ دیتا ہے اور اس میں تخلیقی خوبصورتی اور بامعنی مکالمے ناپید ہو چکے ہیں۔
انکا کہنا تھا کہ موجودہ دور میں بالی ووڈ زیادہ تر اوور دی ٹاپ، تجارتی اور بے معنی ایکشن فلموں تک محدود ہو چکا ہے، اگرچہ جنوبی بھارت کی کچھ فلمیں معیاری ہیں، تاہم مجموعی طور پر وہاں بھی فحش، سطحی اور کم تر معیار کا سینما تیزی سے فروغ پا رہا ہے۔
جمال شاہ کا یہ بیان سوشل میڈیا پر بھی توجہ کا مرکز بن گیا ہے جہاں صارفین انکے تجزیے پر مختلف آرا کا اظہار کر رہے ہیں۔
