قومی اسمبلی کے حلقہ این اے 18 ہری پور میں حال ہی میں ہونیوالے ضمنی انتخابات میں انتخابی ضابطہ اخلاق کی خلاف ورزی کے کیس میں الیکشن کمیشن نے وزیراعلیٰ خیبرپختونخوا سہیل آفریدی کو طلب کرلیا ہے۔
ذرائع کے مطابق الیکشن کمیشن ضمنی انتخابات میں ضابطہ اخلاق کی خلاف ورزی کے مختلف کیسز کی سماعت 10 دسمبر کو کریگا جس کیلئے فریقین کو نوٹس جاری کر دئیے گئے ہیں۔
پاکستان تحریک انصاف کے رہنماء اور قومی اسمبلی میں سابق اپوزیشن لیڈر عمر ایوب کی اہلیہ شہر ناز عمر ایوب کی انتخابی بے ضابطگیوں کی درخواست پر بھی سماعت ہوگی جس میں جعلسازی اور فارم 47 فراہم نہ کرنے کا الزام عائد کیا گیا ہے، ضمنی انتخاب کے نتائج کی فوری دوبارہ گنتی کی درخواست بھی دی گئی تھی جبکہ نتائج کی کنسولیڈیشن کا نوٹس جاری نہ کرنے کیخلاف درخواست بھی دی گئی تھی، مسلم لیگ ن کے رہنماء مرتضی جاوید عباسی کی ڈی ایم او ایبٹ آباد کے فیصلے کیخلاف اپیل بھی سماعت کیلئے مقرر کر دی گئی ہے، الیکشن کمیشن نے حذیفہ رحمن کی ڈی ایم او ڈیرہ غازی خان کے حکم کیخلاف اپیل پر بھی سماعت مقرر کی ہے، پی پی 269 مظفرگڑھ کے مختلف پولنگ سٹیشنز پر ری کائونٹنگ اور ری پولنگ کی درخواست بھی شامل ہے جبکہ محمد اقبال کی طرف سے حلقہ 269 میں ری رولنگ کی درخواست پر بھی سماعت کی جائیگی۔
