روات پولیس نے شہری کو قتل کر کے نعش کنویں میں پھینکنے والے اشتہاری کو گرفتار کر لیا۔
پولیس حکام کے مطابق رواں سال اپریل میں روات کے علاقے میں ایک کنویں سے نعش ملی تھی جسے فائرنگ کر کے قتل کیا گیا تھا، مقتول کی شناخت نعیم اختر کے نام سے ہوئی جو تلہ گنگ کا رہائشی تھا، ابتدائی طور پر پولیس کی مدعیت میں قتل کا مقدمہ درج کر کے تفتیش شروع کی اور ملوث اشتہاری کو ٹریس کر کے گرفتار کیا گیا۔
پولیس حکام کے مطابق ملزم نے ذاتی رنجش پر مقتول کو قتل کرنے کا اعتراف کرلیا ہے۔
دوسری جانب ایس پی صدر انعم شیر نے پولیس ٹیم کو شاباش دیتے ہوئے کہا ہے کہ زیر حراست ملزم کو ٹھوس شواہد کے ساتھ چالان عدالت کر کے سزا دلوائی جائے گی۔
