صدر آصف زرداری نے بھارتی رویئے کو موثر علاقائی تعاون میں بڑی رکاوٹ قرار دیتے ہوئے کہا ہے کہ سارک کے متبادل نئے علاقائی فریم ورک پر غور بڑھ رہا ہے، باہمی احترام اور تعاون سے خطہ زیادہ پرامن اور خوشحال ہوسکتا ہے۔
سارک چارٹر ڈے کی 40ویں سالگرہ کے موقع پر جاری بیان میں صدر مملکت نے جنوبی ایشیائی خطے کے عوام و حکومتوں کو مبارکباد دیتے ہوئے کہا کہ اسلام آباد نے چوتھے اور بارہویں سارک سربراہ اجلاس کی میزبانی کی لیکن 19واں اجلاس 2016ء میں بھارت کی عدم شرکت کے باعث ملتوی ہوا، گزشتہ 11برس سے سارک کا عمل جمود کا شکار ہے۔
انہوں نے کہا کہ بھارت کا رویہ مو ثر علاقائی تعاون میں بڑی رکاوٹ ہے، خطے کی ترقی و امن غیر ضروری طور پر تعطل کا شکار ہے، سارک کے متبادل نئے علاقائی فریم ورک پر غور بڑھ رہا ہے۔
انہوں نے کہا کہ پاکستان جامع، تعاون پر مبنی علاقائی نظام کیلئے پرعزم، تجارت، ٹرانزٹ اور توانائی کے روابط کے فروغ کیلئے تیار ہیں۔
انہوں نے کہا کہ ایران اور چین کی شمولیت سے علاقائی رابطہ کاری میں اضافہ ہوگا۔
صدر زرداری نے کہا کہ خطے کے مسائل مشترکہ ہیں تو حل بھی مشترکہ ہونا چاہئے، باہمی احترام اور تعاون سے خطہ زیادہ پرامن اور خوشحال بن سکتا ہے۔
