چیف جسٹس سپریم کورٹ یحییٰ آفریدی نے سپریم کورٹ بار ایسوسی ایشن کی تجاویز منظور کرتے ہوئے اے ایس ایز کو ایڈووکیٹ آن ریکارڈ کی طرح مقدمات دائر کرنے کی اجازت دے دی۔
سپریم کورٹ بار ایسوسی ایشن کی جانب سے جاری اعلامئے کے مطابق چیف جسٹس سے بار ایسوسی ایشن کے صدر ہارون الرشید اور سیکرٹری بار نے ملاقات کی جس میں عدالتی کارکردگی کو بہتر بنانے اور وکلاء کی فلاح و بہبود کے حوالے سے متعدد امور پر تبادلہ خیال کیا گیا۔
اعلامئے کے مطابق ملاقات کے دوران صدر بار نے درخواست کی اے ایس سی ایز کو ایڈووکیٹ آن ریکارڈ کی طرح مقدمات دائر کرنے کی اجازت دی جائے، چیف جسٹس نے درخواست منظور کرتے ہوئے متعلقہ دفتر کو عمل درآمد کیلئے ضروری اقدامات کرنے کی ہدایت کردی۔
اعلامئے کے مطابق صدر بارنے عوامی سہولت مرکز کی کارکردگی بہتر بنانے کیلئے تجویز دی کہ ڈپٹی رجسٹرار کے عہدے کے ایک افسر کو ضمانتی مچلکوں اور دیگر عدالتی امور سے متعلق معاملات نمٹانے کیلئے تعینات کیا جائے۔
چیف جسٹس نے تجویز سے اتفاق کرتے ہوئے ایک ڈپٹی رجسٹرار کو روزانہ صبح 11بجے سے لیکر ساڑھے 11بجے اور دن 2بجے سے لیکر 2بج کر 20 منٹ تک امور سرانجام دینے کی ہدایت کی ۔
