وفاقی وزیر احسن اقبال نے کہا کہ ملک کو استحکام کی ضرورت، مذہبی انتہا پسندی کا وائرس ختم کرنا ہوگا،27ویں آئینی ترمیم (ن)لیگ نہیں ریاست کیلئے ہے، اتفاق رائے چاہتے ہیں، صوبائی خود مختاری کے خاتمے کا ارادہ نہیں۔
لندن میں میڈیا سے گفتگو کرتے ہوئے اقبال نے کہا کہ معرکہ حق سے قبل بھارت خطے کا تھانیدار بنا ہوا تھا، رات کے حملے کا جواب ہماری مسلح افواج نے صبح کے اجالے میں بھرپور طریقے سے دیا، دشمن کیساتھ جنگ میں قوم اور فوج نے اپنی بہادری ثابت کی، فلسطین اور کشمیر کے لوگوں سے ریاست کی اہمیت پوچھیں۔
انہوں نے کہا کہ شہباز شریف نے اقتدار سنبھالتے ہی مشکل فیصلے لئے، ان کی جگہ کوئی اور وزیر اعظم ہوتا تو ایسے فیصلے نہ لے پاتا، پاکستان تاریخ میں چوتھی بار اڑان بڑھ رہا ہے، تین بار ہم نے اڑان بھری مگر کریش ہو گئیں، سیاسی عدم استحکام کی وجہ سے ماضی میں ہمیں کامیابی نہ مل سکی۔
انہوں نے کہا کہ گزشتہ حکومت جاتے جاتے تیل کی قیمتیں سستی کر گئی، ہمیں آتے ہی مجبورا قیمتوں میں اضافہ کرنا پڑا، اقدام پر کسی شہر میں مظاہرہ نہیں ہوا۔
انہوں نے کہا کہ 27ویں آئینی ترمیم مسلم لیگ (ن)نہیں ملک اور ریاست کیلئے ہے، اس وقت ملک کو ہر قیمت پر استحکام کی ضرورت ہے، مذہبی انتہا پسندی کے وائرس کو ختم کرنا ہوگا۔
انہوں نے کہا کہ ہم 27ویں آئینی ترمیم کیلئے اتفاق رائے چاہتے ہیں، صوبائی خود مختاری ختم کرنے کاارادہ نہیں، لوکل گورنمنٹ کو آئینی تحفظ حاصل ہونا چاہئے۔
