پشاور: خیبرپختونخوا حکومت نے مخصوص نشستیں پی ٹی آئی کو نہ دینے پر الیکشن کمیشن کیخلاف رٹ پٹیشن دائر کرنے کا فیصلہ کرلیا۔ ایک بیان میں مشیر اطلاعات خیبرپختونخوا بیرسٹر سیف نے بتایا کہ صوبائی حکومت نے
مخصوص نشستیں پی ٹی آئی کو نہ دینے پر الیکشن کمیشن کیخلاف رٹ پٹیشن دائر کرنے کا فیصلہ کیا ہے۔ انہوں نے کہا کہ الیکشن کمیشن نے سپریم کورٹ کے اکثریتی فیصلے کے باوجود مخصوص نشستوں کا نوٹیفکیشن جاری نہیں کیا اور تاحال خیبر پختونخوا کی سینیٹ سیٹوں پر انتخابات کا شیڈول بھی جاری نہیں کیا گیا۔
انہوں نے بتایا کہ کابینہ نے پٹیشن دائر کرنے کیلئے ایڈووکیٹ جنرل کو اجازت دے دی ہے۔ انہوں نے کہا کہ الیکشن کمشنر کے متعصبانہ رویئے نے پی ٹی آئی کو ناقابل تلافی نقصان پہنچایا ہے، اعلی عدلیہ کی حکم عدولی پر الیکشن کمشنر توہین عدالت اور آرٹیکل 6کے مرتکب ہو چکے ہیں۔
