جمہوریہ چیک کے شہر برنو میں برنو بین الاقوامی انجینئرنگ میلے کے موقع پر چین-چیک کاروباری سربراہ اجلاس سے چینی سفیر فینگ بیاؤ کے خطاب کی فائل فوٹو-(شِنہوا)
پراگ(شِنہوا)چین اور جمہوریہ چیک کے حکام اور صنعتی رہنماؤں نے برنو میں منعقدہ چین-چیک کاروباری سربراہ اجلاس 2025 میں اقتصادی تعاون کو مضبوط بنانے پر زور دیا اور صنعتی جدت میں مشترکہ مواقع پر روشنی ڈالی۔
جمہوریہ چیک کے نائب وزیر صنعت و تجارت مارٹن فریلچ نے کہا کہ دونوں ممالک کے درمیان تجارتی اور اقتصادی تعلقات مضبوط بنیادوں، طویل مدتی صلاحیتوں اور واضح مستقبل کے تصور پر مبنی ہیں۔
فریلچ نے کہا کہ چین جمہوریہ چیک کے بڑے تجارتی شراکت داروں میں سے ایک ہے اور صنعتی جدت، خودکار نظام، ڈیجیٹلائزیشن اور پائیداری جیسے شعبوں میں نئے مواقع ابھر رہے ہیں۔ انہوں نے وزارت کی جانب سے شراکت داری کو فروغ دینے سمیت چین میں مستقبل کے تجارتی میلوں میں جمہوریہ چیک کی شرکت کی حمایت کا عزم بھی دہرایا۔
چیک ایسوسی ایشن آف انجینئرنگ ٹیکنالوجی کے صدر جان ریڈل نے کہا کہ حالیہ سالوں میں مشین بنانے والے آلات کی تجارت بہت تیزی سے بڑھی ہے۔ انہوں نے کہا کہ یہ اس بات کی نشاندہی ہے کہ دونوں ممالک کے درمیان تعاون بہت اچھا اور روز بروز مضبوط ہوتا جا رہا ہے۔
چینی سفارتخانے کے اقتصادی و تجارتی مشیر لیو ہایان نے کہا کہ چین اور جمہوریہ چیک کے اقتصادی اور تجارتی تعلقات کی بنیاد مضبوط اور امکانات وسیع ہیں۔
لیو نے چیک حکومت، کاروباری برادری اور سول سوسائٹی کے ساتھ تعاون کرنے کی آمادگی ظاہر کی تاکہ تعاون کی صلاحیتوں کو بروئے کار لایا جا سکے، پالیسی ہم آہنگی مضبوط کی جا سکے، روابط کو بہتر بنایا جا سکے اور عوامی تبادلوں کو گہرا کیا جا سکے تاکہ دوطرفہ تعلقات کی مستحکم اور صحت مند ترقی کو فروغ ملے۔
یہ سربراہ اجلاس چین کے سفارتخانے اور جمہوریہ چیک کی وزارت صنعت و تجارت نے مشترکہ طور پر منعقد کیا تھا۔
