اسلام آباد : وزیر اعظم آزاد کشمیر چودھری انوارالحق نے کہا ہے کہ آزاد کشمیر ماحولیاتی تبدیلوں،قدرتی آفات سے سب سے زیادہ متاثر ہے،ہمیں خود کو ماحولیاتی تبدیلوں کا مقابلہ کرنے کیلئے تیار کرنا،نقصان کم سے کم کرنے کیلئے عوام کو آگاہی فراہم کرنا ہوگی۔
تفصیلات کے مطابق 8 اکتوبر 2005ء کو آزاد کشمیر میں آنیوالے ہولناک زلزلے کی 19 ویں برسی کے موقع پر مظفرآباد میں یونیورسٹی کالج گراؤنڈ میں یادگار شہداء پر تقریب کا انعقاد کیا گیا جس میں بڑی تعداد میں وزراء، انتظامیہ اور شہریوں نے شرکت کی۔
تقریب میں 8 بجکر 52 منٹ پر سائرن بجا کر ایک منٹ کی خاموشی اختیار کی گئی، وزیراعظم آزاد کشمیر نے یادگار شہداء پر پھول رکھے اور فاتحہ خوانی کی جبکہ پولیس دستے کی جانب سے سلامی پیش کی گئی،یادگار شہداء پر چین، روس، سعودیہ، جاپان، عرب امارات، امریکا، برطانیہ اور اقوام متحدہ کے پرچم بھی لہرائے گئے۔
تقریب سے خطاب کرتے ہوئے وزیراعظم آزاد کشمیرچودھری انوار الحق نے کہا کہ 8 اکتوبر2005ء کے سانحہ میں عالمی برادری نے زلزلہ میں انسانی ہمدردی کی نئی مثال قائم کی جن ممالک نے سانحہ میں ہماری مدد کی ان کی خدمات کو یاد رکھا جائیگا۔
انہوں نے کہا کہ زلزلے کے بعد حکومت پاکستان اور پاکستانی قوم اس سانحہ سے مقابلہ کرنے کیلئے ایک ایسی زنجیر بن گئی جس سے ہمارے حوصلے بڑھے۔ انہوں نے کہا کہ آج اجڑی بستیاں آبادیوں میں تبدیل ہو چکی ہیں، کھنڈرات کا منظر پیش کرنے والی سڑکوں کی جگہ شاہرات نے لے لی ہے، عوام کو زندگی کی تمام بنیادی سہولتیں پہنچانے کیلئے اقدامات جاری ہیں۔
انہوں نے کہا کہ ان سب تعمیراتی سرگرمیوں میں تعمیر نو پر مامور قومی اداروں نے ایک مثالی کردار ادا کیا،ہم آزاد کشمیر کے ہر شہر اور گاؤں میں جدید سہولیات فراہم کرینگے۔انہوں نے کہا کہ آزاد کشمیر ماحولیاتی تبدیلوں،قدرتی آفات سے سب سے زیادہ متاثر ہے،ہمیں اپنے آپ کو ماحولیاتی تبدیلوں کا مقابلہ کرنے کیلئے تیار کرنا، قدرتی آفات سے نمٹنے اور نقصان کو کم سے کم کرنے کیلئے عوام کو آگاہی فراہم کرنا ہوگی۔
علاوہ ازیں آٹھ مقام ڈسٹرکٹ کمپلیکس میں بھی 8 اکتوبر 2005ء کے ہولناک زلزلے کے حوالے سے شہداء کی یاد میں دعائیہ تقریب کا انعقاد کیا گیا جس میں سائرن بجا کر ایک منٹ کی خاموشی اختیار کرکے شہداء کوخراج عقیدت پیش کیا گیا۔
ادھر میرپور سٹیڈیم میں بھی اس بارے پروقار تقریب کا انعقاد کیا گیا اور کرکٹ سٹیڈیم سے چوک شہیداں تک واک کا اہتمام کیا گیا، واک میں ڈپٹی کمشنر یاسر ریاض اور ایس ایس پی خاور علی نے شرکت کی۔
واضح رہے کہ پاکستان کے شمالی علاقوں میں آنیوالے تباہ کن زلزلے کو 19سال مکمل ہو گئے،8 اکتوبر 2005ء کو آنیوالے7.6 شدت زلزلے سے آزاد کشمیر اور ہزارہ ڈویژن سمیت خیبر پختون خوا کے مختلف اضلاع میں وسیع پیمانے پر تباہی ہوئی تھی، زلزلے میں 80 ہزار سے زائد افراد جاں بحق ہوئے تھے جبکہ آبادیاں ملبے کے ڈھیر میں تبدیل ہو گئی تھیں۔
