اسلام آباد: وزیراعظم شہباز شریف نے تعلیم کو معاشی، سماجی و قومی ترقی کی بنیاد قرار دیتے ہوئے کہا ہے کہ تعلیم محض لکھنے پڑھنے کی صلاحیت سے واقفیت نہیں، انفرادی و اجتماعی سطح پر قوم کی بنیادوں کو مضبوط کر کے تابناک مستقبل کی طرف سفر کرنے کا نام ہے، وفاقی اور صوبائی حکومتیں علم و تدریس کے فروغ اور خواندگی کے شرح میں اضافہ کیلئے متحد ہیں۔
عالمی یوم خواندگی پر جاری بیان میں شہباز شریف نے کہا کہ خواندگی کے عالمی دن پر پاکستان دنیا کیساتھ ہم آواز ہو کر علم و تدریس کی قوموں کی تعلیمی،معاشی و معاشرتی زندگی میں اہمیت اور ترقی و خوشحالی میں بنیادی حیثیت کو اجاگر کرنا اپنا فرض سمجھتا ہے۔
انہوں نے کہا کہ تعلیم محض لکھنے پڑھنے کی صلاحیت یا حروف تہجی سے واقفیت کا نام نہیں بلکہ یہ انفرادی اور اجتماعی سطح پر کسی بھی قوم کی بنیادوں کو مضبوط کرتے ہوئے تابناک مستقبل کی طرف سفر کرنے کا نام ہے۔
وزیراعظم نے کہا کہ تعلیم و تربیت، خواندگی اور علم و تدریس کا یہ سفر کسی بھی قوم کی نسلوں کو سنوارنے کی ایک جہد مسلسل ہے، لہٰذا یہ کسی بھی ملک کی مجموعی اور بامعنی ترقی کیلئے حکومت کی اولین ترجیح ہونی چاہئے۔
انہوں نے کہا کہ پاکستان میں خواندگی کی شرح 60 فیصد ہے جو کہ نہ صرف دنیا کے جدید تقاضوں سے کم ہے بلکہ جنوبی ایشیا کے دوسرے ممالک سے بھی کم ہے۔وزیراعظم نے کہا کہ یہ فکر انگیز صورتحال ہمیں اس بات کی یاد دہانی کراتی ہے کہ ہمیں بحیثیت قوم تعلیم کے حصول کو اپنی ترجیحات میں شامل کرتے ہوئے ہر ممکن اقدامات اٹھانے کی ضرورت ہے تاکہ ہم اپنے بچوں، جوانوں اور معاشرے کی اجتماعی ترقی کے راستے کھول سکیں۔
انہوں نے کہا کہ تعلیم کے حصول کی اہمیت دین اسلام کی بنیادی تعلیمات میں شامل ہے اور بانی پاکستان محمد علی جناح نے بھی اس کی اہمیت کو اجاگر کیا۔ انہوں نے کہا کہ وفاقی اور صوبائی حکومتیں علم و تدریس کے فروغ اور خواندگی کے شرح میں اضافہ کیلئے متحد ہیں، اس قومی مہم کا بنیادی مقصد یہ ہے کہ ہر بچہ نہ صرف بنیادی تعلیم حاصل کرے بلکہ اعلی تعلیم، ہنر مندی اور ٹیکنیکل علم سے اسکی واقفیت بھی یقینی ہو۔
وزیراعظم نے کہا کہ قوم کی نسلوں کوجدید دور کی تقاضوں سے ہم آہنگ کرنے کا یہ واحد راستہ ہے لیکن یہ قومی مقصد کوئی بھی حکومت عوام کی حمایت کے بغیر حاصل نہیں کر سکتی اس کیلئے اساتذہ، والدین،اور سماجی سطح پر ہر شہری کو اپنا فرض اور کلیدی کردار ادا کرنا ہوگا۔
وزیراعظم نے کہا کہ آئیے آج مل کر اس عزم کا اعادہ کریں کہ ہم بحیثیت قوم ناخواندگی کے اندھیرے کو علم کی روشنی سے منور کریں گے اور ایک مضبوط، باصلاحیت اور ترقی یافتہ پاکستان کی بنیاد رکھیں گے۔
