اسلام آباد: زرعی ترقیاتی بینک قرضداروں سے 9ارب روپے وصول نہ کرسکا۔ منگل کو قومی اسمبلی کی پبلک اکائونٹس کمیٹی کا اجلاس چیئرمین جنید اکبر کی زیر صدارت منعقد ہوا۔
اجلاس میں زرعی ترقیاتی بینک کی جانب سے 1601قرض داروں سے 9ارب روپے وصول نہ کرنے کا انکشاف ہو جس پر کمیٹی اراکین نے حیرانی کا اظہار کیا۔
آڈٹ حکام نے بتایا کہ کوئٹہ، کراچی اور لاہور کے قرض داروں سے16 فیصد واجب الادا رقم وصول کی گئی ہے، تاہم ملک بھر میں زرعی ترقیاتی بینک کے نادہندگان کی تعداد میں اضافہ ہورہا ہے۔
رکن کمیٹی خواجہ شیراز نے استفسار کیا کہ ملک میں اس وقت جو سیکٹر منافع میں ہے وہ بینکنگ ہے لیکن زرعی ترقیاتی بینک کیوں مسلسل ڈوب رہا ہے۔
چیئرمین کمیٹی نے ہدایت کی کہ ریکوری ہونیوالی رقم کا آڈٹ سے ڈبل چیک کروایا جائے جبکہ باقی کی وصولی سے بھی کمیٹی کو آگاہ کیا جائے۔
