کراچی: جسٹس جنید غفار نے بطور چیف جسٹس سندھ ہائیکورٹ عہدے کا حلف اٹھا لیا۔
منگل کو گورنر ہائوس سندھ میں چیف جسٹس کی تقریب حلف برادری کا انعقاد ہوا جس میں گورنر کامران ٹیسوری نے جسٹس جنید غفار سے چیف جسٹس سندھ ہائیکورٹ کا حلف لیا، تقریب میں وزیراعلی سندھ، ججز اورسینئر وکلا ء نے شرکت کی۔
بعدازاں چیف جسٹس جنید غفار نے مزار قائد پر حاضری دی اور فاتحہ خوانی کی۔ مزار قائد آمد پر پاکستان نیوی کے دستے نے چیف جسٹس کو سلامی پیش کی۔
اس موقع پر چیف جسٹس سندھ ہائی کورٹ جسٹس محمد جنید غفار نے میڈیا سے گفتگو کرتے ہوئے کہا کہ روایت رہی ہے حلف برداری کے بعد مزار قائد پر حاضری دیتے ہیں، اہم ذمہ داریاں ملنے پر اللہ کا شکر گزار ہوں، کوشش ہوگی اپنے فرائض کو احسن طریقے سے انجام دوں۔
انہوں نے کہا کہ بہتر سے بہترکارکردگی دکھانے کی کوشش کروں گا، ماتحت عدالت میں ججز کی تقرری کا سلسلہ شروع کر دیا ہے، ماتحت عدالتوں میں سول ججز کی عنقریب تقرریاں ہوجائیں گی، مزید ججز کی تقرریوں سے عدالتوں پر دبائو کم ہوگا۔
انہوں نے کہا کہ آئین میں ترمیم کے بعد آئینی و ریگولر بنچز کی کیٹیگریز بنائی ہے، بنچز کے دائرہ اختیار سے متعلق تنازعات کیلئے لارجر بنچز تشکیل دیئے ہیں، وقت کے ساتھ سب ٹھیک ہو جائے گا۔ انہوں نے کہا کہ پہلی بار یہ ترمیم ہوئی یہ کنفیوژن موجود رہے گی، درخواست گزار بھی شفافیت سے استدعا نہیں لکھتے، سب کو سمجھنے کی ضرورت ہے۔
