بیجنگ(شِنہوا)چین کی وزارت تجارت نے جمعرات کو کہا ہے کہ وینزویلا کی سیاسی صورتحال میں تبدیلیوں کے باوجود ملک کے ساتھ اقتصادی اور تجارتی تعلقات کو مسلسل گہرا کرنے کا چین کا عزم برقرار رہے گا۔
وزارت تجارت کے ترجمان حہ یادونگ نے معمول کی پریس کانفرنس کے دوران ایک متعلقہ سوال کا جواب دیتے ہوئے کہا کہ امریکہ کے بالادستی کے اقدامات بین الاقوامی قانون کی سنگین خلاف ورزی ہیں۔ وینزویلا کی خودمختاری کو پامال کرتے ہیں اور لاطینی امریکہ میں امن و سلامتی کے لئے خطرہ ہیں۔ انہوں نے واضح کیا کہ چین اس کی سخت مخالفت کرتا ہے۔
انہوں نے اس بات پر زور دیا کہ چین اور وینزویلا کے درمیان اقتصادی اور تجارتی تعاون دو خودمختار ریاستوں کے درمیان تعاون ہے، جسے بین الاقوامی قانون کے ساتھ ساتھ دونوں ممالک کے قوانین کا تحفظ حاصل ہے اور کسی دوسرے ملک کو اس میں مداخلت کا کوئی حق نہیں ہے۔
ترجمان نے یہ بھی کہا کہ چین نے لاطینی امریکی ممالک کے ساتھ اقتصادی اور تجارتی تعاون میں ہمیشہ برابری اور باہمی فائدے کے اصولوں پر عمل کیا ہے اور کبھی بھی اپنے اثر و رسوخ کے دائرے بڑھانے یا کسی تیسرے فریق کو نشانہ بنانے کی کوشش نہیں کی۔
حہ یادونگ نے کہا کہ معاشی ہم آہنگی چین اور لاطینی امریکہ کے درمیان معاشی اور تجارتی تعاون کے لئے ایک ٹھوس بنیاد کا کام کرتی ہے جس کی نمایاں خصوصیات شفافیت، جامعیت اور باہمی مفاد پر مبنی نتائج ہیں۔
ترجمان نے مزید کہا کہ چین لاطینی امریکی ممالک کے ساتھ مل کر یکجہتی اور تعاون کے ذریعے عالمی تبدیلیوں کا مقابلہ کرنا جاری رکھے گا اور برابری و باہمی فائدے کی بنیاد پر تجارتی تعاون کو فروغ دے کر مشترکہ ترقی کا ہدف حاصل کرے گا۔
