ایشیز سیریز میں آسٹریلیا کے ہاتھوں بدترین شکست پر انگلینڈ کے سابق کپتان جیفری بائیکاٹ اپنی ٹیم پر پھٹ پڑے۔
غیر ملکی میڈیا کے مطابق جیفری بائیکاٹ نے کہا کہ انگلینڈ ٹیم اسوقت تک تبدیل نہیں ہوگی جب تک مغرور رجیم ختم نہیں ہوگا، برینڈ میکلم، راب کی اور بین سٹوکس نے تین برسوں میں جھوٹ بیچا ہے، تینوں کی رجیم نے انگلینڈ کرکٹ لورز کو مایوس کیا ہے، برینڈن میکلم اور راب کی نے ہمیشہ یہی کہا کہ وہ ایشیز کی تیاری کر رہے ہیں، ایشیز سیریز میں غلطیوں پر غلطیاں کی گئیں، وہ 4-1سے ہارنے کے حقدار تھے، برینڈ میکلم کی فلاسفی یہی ہے ،اپنے انداز میں چلو دنیا کی پرواہ کیے بغیر کھیلو۔
انگلینڈ کے سابق کپتان نے کہا کہ کھلاڑیوں کو کہا جاتا ہے جا اور خود کا اظہار کرو، آئوٹ ہوجائو نو پرابلم، ان سے کوئی جان نہیں چھڑاتا، کوئی کسی کو ڈراپ نہیں کرتا، کوئی احتساب نہیں ہوتا، اپنی مرضی کی چیزیں کرنے کیلئے فری لائسنس دیا گیا ہے۔
جیفری بائیکاٹ کا کہنا تھا کہ ہمارے پاس باصلاحیت کرکٹرز ہیں لیکن انکی سکلز کو نہیں نکھارا گیا، تین عقلمند افراد بتاتے رہے ہیں کہ وہ جانتے ہیں کہ آسٹریلیا میں ایشیز جیتنا کتنا اہم ہے، آسٹریلیا میں جیتنے والے تمام سابق کرکٹرز بتاتے رہے ہیں کہ وہ غلط کر رہے ہیں، یہ تین عقلمند افراد سمجھتے رہے ہیں کہ وہ بہتر جانتے ہیں، ان تینوں نے آسٹریلیا میں کبھی سیریز نہیں جیتی، سابق کرکٹرز کو ماضی کا حصہ قرار دیکر ہمارے کپتان نے خود کو شرمندہ اور سابق کھلاڑیوں کو بے عزت کیا ہے، یہ کبھی اپنی نوکریاں کھونا نہیں چاہیں گے کیونکہ انہیں بہت معاوضہ ملتا ہے۔
