پاکستان اور سعودی عرب نے دفاعی تعاون مزید بڑھانے پر اتفاق کیا ہے۔
آئی ایس پی آر کی جانب سے جاری بیان کے مطابق سربراہ پاک فضائیہ ایئر چیف مارشل ظہیر احمد بابر سدھو نے سعودی عرب کا دورہ کیا اور کمانڈر رائل سعودی ائیر فورس لیفٹیننٹ جنرل ترکی بن بندر بن عبدالعزیز اور چیف آف جنرل سٹاف جنرل فیاض بن حمید الرولی سے ملاقات کی۔
ترجمان کے مطابق ملاقاتوں میں علاقائی سیکیورٹی صورتحال اور مستقبل کے دفاعی اشتراک پر تبادلہ خیال کیا گیا اور مشترکہ تربیت، آپریشنل تعاون و پیشہ ورانہ تجربات کے تبادلے پر زور دیا گیا۔
ایئر چیف مارشل نے دو طرفہ تاریخی اور برادرانہ تعلقات کو اجاگر کیا اور بین الاقوامی اور دوطرفہ مشقوں کے ذریعے فوجی تعاون بڑھانے کے عزم کا اعادہ کیا۔
ایئر چیف نے سعودی دفاعی یقادت کو پاک فضائیہ کی ملٹی ڈومین فورس میں تبدیلی کے متعلق آگاہ کیا۔
سعودی دفاعی قیادت نے پاک فضائیہ کی پیشہ ورانہ مہارت اور جنگی تیاری کی تعریف کی اور پاک فضائیہ کیساتھ مشترکہ تربیت بڑھانے میں گہری دلچسپی کا اظہار کیا۔
سعودی دفاعی قیادت نے علاقائی امن و استحکام میں پاکستان کے مثبت کردار کو سراہا اور دفاع اور ایوی ایشن شعبوں میں تعاون کو مزید وسعت دینے کے عزم کا اعادہ کیا۔
سعودی دفاعی قیادت نے پاک فضائیہ کی سپیس، سائبر، الیکٹرانک وار فیئر اور اے آئی صلاحیتوں میں گہری دلچسپی کا اظہار کیا۔
فریقین نے پاکستان سعودی عرب دفاعی معاہدے کو اعتماد اور بھائی چارے کی علامت قرار دیا ۔
