فلسطینی مزاحمتی تنظیم حماس نے اعلان کیا ہے کہ غزہ پر اسرائیلی فوج کا قبضہ ختم ہونے کی صورت میں وہ اپنے ہتھیار اس علاقے کا انتظام سنبھالنے والی فلسطینی اتھارٹی کے حوالے کرنے کو تیار ہے۔
غیر ملکی میڈیا کے مطابق حماس کی مذاکراتی ٹیم کے سربراہ خلیل الحیہ نے اپنے بیان میں کہا کہ ہمارے ہتھیار قبضے اور جارحیت کی وجہ سے ہیں اگر قبضہ ختم ہو جائے تو یہ ہتھیار ریاست کے اختیار میں دی دئیے جائینگے تاہم انکے دفتر نے وضاحت کی کہ وہ ایک آزاد اور مکمل خودمختار فلسطینی ریاست کی بات کر رہے تھے۔
انہوں نے کہا کہ ہم اقوامِ متحدہ کی فورسز کی تعیناتی کو قبول کرتے ہیں جو سرحدوں کی نگرانی کریں اور جنگ بندی پر عمل کروائیں تاہم ایسی بین الاقوامی فورس کو مسترد کرتے ہیں جس کا مقصد حماس کو غیر مسلح کرنا ہو۔
علاوہ ازیں قطر کے وزیراعظم نے کہا ہے کہ غزہ کی پٹی میں تقریبا ًدو ماہ پرانی جنگ بندی اسوقت تک مکمل نہیں ہوگی جب تک اسرائیلی افواج امن معاہدے کے تحت فلسطینی علاقے سے واپس نہیں چلی جاتیں، ادھر مصر نے اعلان کیا ہے کہ وہ غزہ کیلئے 5,000 پولیس اہلکاروں کو تربیت دیگا اور وہ ان ممالک میں شامل ہے جنہیں استحکام فورس میں فوج بھیجنے کیلئے ممکنہ امیدوار سمجھا جا رہا ہے۔
