چین کے زرمبادلہ کے ذخائر 32.659 کھرب امریکی ڈالر تک پہنچ گئے

چین کے زرمبادلہ ذخائر بڑھ گئے۔(شِنہوا)

بیجنگ(شِنہوا)چین میں نومبر کے اختتام پر زرمبادلہ کے ذخائر 32.659 کھرب امریکی ڈالر رہے جو اکتوبر کے اختتام سے 4.8 ارب ڈالر یا 0.15 فیصد زائد ہیں۔

ریاستی انتظامیہ برائے زرمبادلہ نے ایک بیان میں بتایا کہ بڑی معیشتوں کی زری پالیسیوں، مارکیٹ کی توقعات اور میکرو اکنامک اعداد و شمار کے اثرات کے باعث گزشتہ ماہ امریکی ڈالر انڈیکس اور عالمی مالیاتی اثاثوں کی قیمتوں دونوں میں اضافہ ہوا۔

بیان کے مطابق کرنسی کی شرح تبادلہ اور اثاثوں کی قیمتوں میں تبدیلی جیسے عوامل کے مشترکہ اثرات کی بدولت چین کے زرمبادلہ کے ذخائر میں گزشتہ ماہ اضافہ ہوا۔

انتظامیہ نے کہا کہ ملک کی معاشی بحالی کی رفتار میں اضافہ اور مارکیٹ کا اعتماد بہتر ہو رہا ہے۔ یہ عوامل ملک کے زرمبادلہ کے ذخائر کو مستحکم سطح پر برقرار رکھنے کے لئے سازگار ہیں۔

پیپلز بینک آف چائنہ کے جاری کردہ اعداد و شمار کے مطابق نومبر کے اختتام پر ملک کے سونے کے ذخائر بڑھ کر 7 کروڑ 29 لاکھ 60 ہزار اونس ہوگئے جو ایک ماہ قبل 7 کروڑ 28 لاکھ اونس تھے۔