اسلام آباد: نائب وزیراعظم اسحاق ڈار نے کپاس کو قومی معیشت میں مرکزی حیثیت دلانے، عالمی مسابقت کی مضبوطی اور کسانوں کی آمدن میں اضافے کیلئے مربوط و قابل عمل اقدامات کی ضرورت پر زور دیتے ہوئے وزارت قومی غذائی تحفظ کو گزشتہ اجلاسوں میں کئے گئے پالیسی مشوروں کو قابل عمل اقدامات میں بدلنے کیلئے ایکشن پلان تیار کرنے کی ہدایت کردی۔
جاری بیان کے مطابق جمعرات کو نائب وزیراعظم اسحاق ڈار کی زیر صدارت کابینہ کمیٹی برائے ضروری نقد آور فصلوں کے چوتھے اجلاس کا انعقاد ہوا جس میں وزیر قومی غذائی تحفظ، وزیر اعظم کے معاون خصوصی طارق باجوہ، وزارت تجارت، ایف بی آر، ایم این ایف ایس آر کے اعلی نمائندوں کے علاوہ صوبائی حکومتوں اور دیگر متعلقہ محکموں اور سٹیک ہولڈر تنظیموں کے اہلکاروں نے شرکت کی۔
اجلاس میں پیداوار اور منافع میں اضافے، بیج کے معیار کی بہتری ،ٹیکنالوجی اور تحقیق اپنانے، موسمیاتی خطرات سے نمٹنے اور عوامی و نجی سطح پر کپاس کی ویلیو چین کے تمام سٹیک ہولڈرز کو متحرک کرنے پر تبادلہ خیال کیا گیا ۔وزیر خارجہ نے کپاس کو قومی معیشت میں مرکزی حیثیت دلانے، عالمی مسابقت کو مضبوط بنانے اور کسانوں کی آمدنی بڑھانے کیلئے مربوط، شواہد پر مبنی اور قابل عمل اقدامات کی ضرورت پر زور دیا۔
انہوں نے وزارت قومی غذائی تحفظ کو ہدایت کی کہ وہ ایک ایکشن پلان تیار کریں تاکہ گزشتہ اجلاسوں میں کئے گئے پالیسی مشوروں کو قابل عمل اقدامات میں تبدیل کیا جا سکے۔ نائب وزیرعظم نے کہا کہ اس مقصد کیلئے فالو اپ کمیٹی تشکیل دی جائے گی۔
