کراچی: سپریم کورٹ نے پسند کی شادی کرنیوالی لڑکی کو شوہر کیساتھ جانے کی اجازت دیتے ہوئے ریمارکس دیئے ہیں کہ پسند کی شادی پر قانونی کارروائی نہ کی جائے، یہ بری بات ہے، جو ہوگیا سو ہوگیا۔
جمعرات کو سپریم کورٹ کراچی رجسٹری میں چیف جسٹس کی سربراہی میں بینچ نے پسند کی شادی اور مذہب تبدیلی بارے دائر درخواست پر سماعت کی اسلام قبول کرنیوالی لڑکی بینش عدالت میں پیش ہوئی جس پر عدالت نے بینش اور روما کے دستخط شدہ بیانات درخواست گزار والد کے حوالے کرتے ہوئے کہا آپ پڑھ لیں، آپ کی بیٹی نے بیان دیا کہ اس نے اپنی مرضی سے شادی کی ہے، ایسے مسائل عدالت میں نہیں لانے چاہئیں، ایسے معاملے میں قانونی چارہ جوئی نہ کیا کریں یہ بری بات ہے۔
لڑکیوں کے والد نے استدعا کی کہ عدالت میری بات تو سن لے جس پر چیف جسٹس نے کہا کہ ہم اگر آپ کو سنیں گے تو پھر ہمیں کچھ اور بھی کرنا پڑے گا جو ہم نہیں چاہتے، جب بچوں کی خاص عمر ہوجائے تو وہ اپنے فیصلے خود کرتے ہیں۔چیف جسٹس نے لڑکیوں کو مخاطب کیا کہ آپ ان کی بیٹیاں ہیں، والد نے کیس کیا، اس کا مطلب یہ نہیں رابطہ منقطع کردیا جائے جو ہوگیا سو ہوگیا، عدالت نے والد کو مخاطب کرتے ہوئے کہا آپ بچوں کے نانا ہیں، مل بیٹھ کر سوچیں۔
جسٹس یحییٰ آفریدی نے لڑکیوں سے کہا کہ آپ کے والد چاہتے ہیں کہ آپ کیساتھ کوئی زبردستی نہ ہو اور آپ خوش رہیں، اگر والد کو پتہ ہو بچے خوش ہیں تو وہ کبھی ایسا نہیں چاہے گا۔
بعدازاں عدالت نے رجسٹرار کے کمرے میں والد اور بیٹیوں کی ملاقات کروانے کی ہدایت کی اور لڑکی کو شوہر کیساتھ جانے کی اجازت دے دی ۔وکیل درخواست گزار کی جانب سے درخواست واپس لینے پر کیس نمٹا دیاگیا۔
