اسلام آباد: وفاقی وزیرداخلہ محسن نقوی نے مستونگ میں سیکیورٹی فورسز کی گاڑی پر دھماکے کی مذمت کرتے ہوئے کہا ہے کہ فتنہ الہندوستان کے دہشتگردوں کی بزدلانہ کارروائی بلوچستان میں قیام امن کی کوششوں کو سبوتاژ کرنے کی گھنائونی سازش ہے، قوم کی حمایت سے بھارتی سپانسرڈ دہشتگردوں کا صفایا کریں گے۔
جاری بیان میں محسن نقوی نے حملے میں شہید ہونیوالے میجر رضوان طاہر ، نائیک ابن امین اور لانس نائیک محمد یونس کو خراج عقیدت پیش کرتے ہوئے اہل خانہ سے دلی ہمدردی و تعزیت کا اظہار کیا۔
وزیر داخلہ نے کہا کہ بہادر سپوتوں نے وطن کے لئے جان نچھاور کرکے فرض شناسی کی اعلی مثال قائم کی،عظیم قربانی کو ہمیشہ یاد رکھا جائے گا،سکیورٹی فورسز کے بہادر سپوتوں نے جوانمردی سے فتنہ الہندوستان کے دہشتگردوں کا مقابلہ کیا۔
انہوں نے کہا کہ سکیورٹی فورسز نے بروقت کارروائی کرکے بھارتی حمایت یافتہ 4 دہشتگردوں کو عبرتناک انجام تک پہنچایا۔ محسن نقوی نے کہا کہ فتنہ الہندوستان کے دہشتگردوں کی بزدلانہ کارروائی بلوچستان میں قیام امن کی کوششوں کو سبوتاژ کرنے کی گھنانی سازش ہے۔ انہوں نے کہا کہ انشااللہ قوم کی حمایت سے بھارتی سپانسرڈ دہشتگردوں کا صفایا کریں گے ۔
