قاہرہ میں دو روزہ مشترکہ بین الاقوامی فارمیسی کانفرنس 2026 اختتام پذیر ہو گئی۔ کانفرنس میں ادویہ سازی کی مغربی صنعت اور روایتی چینی طب کے امتزاج میں مصنوعی ذہانت کے استعمال پر خاص توجہ مرکوز کی گئی۔
کانفرنس کا اہتمام مصر چین یونیورسٹی اور روایتی چینی طب پر تحقیق اور فروغ کی چینی ایسوسی ایشن نے باہمی اشتراک سے کیا تھا۔ کانفرنس میں اس بات کا بھی جائزہ لیا گیا کہ ڈیجیٹل ٹیکنالوجی کو قدیم طبی روایات میں کیسے استعمال کیا جا سکتا ہے۔ اختتامی نشستوں میں ڈیٹا پر مبنی ادویہ سازی اور مریضوں کی ذاتی سطح پر بھرپور دیکھ بھال میں مصنوعی ذہانت کے کردار کو اجاگر کیا گیا۔
مصر چین یونیورسٹی میں فیکلٹی آف فارمیسی اینڈ ڈرگ ٹیکنالوجی کے ڈین اور کانفرنس کے صدر مینا تیدروس نے کہا کہ اس تقریب کا مقصد مغربی طب اور روایتی چینی طریقۂ علاج کے درمیان انضمام کو فروغ دینا ہے۔
انہوں نے بتایا کہ اس موقع پر منعقدہ نمائش میں ادویات اور طبی آلات بنانے والی مصر کی 12 اور چین کی چار بڑی کمپنیاں شریک ہوئیں۔
چینی ایسوسی ایشن کی ایکسٹرنل تھراپی کمیٹی کے سینئر ماہر ژو چاؤ پِنگ نے کہا کہ مصر روایتی چینی طب کو دنیا بھر تک پہنچانے میں اہم کردار ادا کر سکتا ہے۔ انہوں نے مصر کے جغرافیائی محل وقوع اور چین و افریقہ کے ساتھ تعلقات کا حوالہ دیا جن میں ’ایک خطہ ایک سڑک‘ کے منصوبے کے تحت تعاون بھی شامل ہے۔
آخری روز شرکا نے جینیات، ویکسین کی تیاری اور ادویہ سازی میں ڈیجیٹل تبدیلی پر پیش رفت کا جائزہ لیا۔ منتظمین کا کہنا تھا کہ اس تبادلے سے مصری اور چینی اداروں کے درمیان نئی تحقیقی شراکتیں قائم ہونے کی توقع ہے جو مصر میں صحت عامہ کی ترجیحات میں معاون ثابت ہوں گی۔
قاہرہ سے شِنہوا نیوز ایجنسی کے نمائندوں کی رپورٹ
۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹیکسٹ آن سکرین:
قاہرہ میں مشترکہ بین الاقوامی فارمیسی کانفرنس 2026 اختتام پذیر
مصری و چینی ماہرین کا طب میں مصنوعی ذہانت کے استعمال پر تبادلہ خیال
کانفرنس کا اہتمام مصر چین یونیورسٹی اور چینی ایسوسی ایشن نے مل کر کیا تھا
شرکا نے جدید ادویات اور روایتی چینی طب کے انضمام پر گفتگو کی
12 مصری اور 4 چینی کمپنیاں طبی مصنوعات کی نمائش میں شریک ہوئیں
مصر عالمی سطح پر چینی ادویات کے فروغ میں اہم کردار ادا کر سکتا ہے
اختتامی سیشن میں جینیات، ویکسین، اور ڈیجیٹل مینوفیکچرنگ اہم موضوعات تھے
کانفرنس سے مصری و چینی اداروں کو نئی تحقیقاتی شراکتوں کے مواقع ملیں گے
