سپین کے 37 سالہ سوشل میڈیا سٹریمر اور انفلوئنسر سرجیو جیمنیز لائیو سٹریمنگ کے دوران چل بسے۔
غیر ملکی میڈیا رپورٹس کے مطابق سرجیو جیمنیز ایک انتہائی خطرناک آن لائن چیلنج میں حصہ لے رہے تھے جس کے تحت انہوں نے ناظرین کی ادائیگی کے بدلے چھ گرام کوکین اور وسکی کی ایک مکمل بوتل استعمال کرنے کا وعدہ کیا تھا، یہ لائیو سٹریمنگ یکم جنوری کی رات ہو رہی تھی تاہم وہ ایمبولینس بلانے سے پہلے ہی دم توڑ گئے۔
رپورٹس کے مطابق سرجیو کی والدہ ٹریسا نے انہیں کمرے کے اندر فرش پر گھٹنوں کے بل گرے ہوئے پایا، کمرے میں ایک تقریبا خالی وسکی کی بوتل، انرجی ڈرنکس اور ایک سرخ پلیٹ پر کوکین بھی موجود تھی۔
ٹریسا کے مطابق رات دو بجے میں باتھ روم جانے کیلئے اٹھی تو دیکھا کہ اسکے کمرے کا دروازہ کھلا ہوا ہے، میں نے اس سے پوچھا وہ کیا کر رہا ہے لیکن کوئی جواب نہیں آیا، جب اندر جانے کی کوشش کی تو فرش پر کپڑے دوسری چیزیں پڑی تھیں جس کی وجہ سے میں داخل نہ ہو سکی، میں باہر سے مسلسل آواز دیتی رہی لیکن اس نے کوئی جواب نہیں دیا، میں نے دیکھا کہ وہ بستر پر گھٹنوں کے بل جھکا ہوا تھا، جیسے دعا کر رہا ہو۔
واقعے کے بعد حکام نے تحقیقات کا آغاز کر دیا ہے اور سرجیو جیمنیز کی لاش کا پوسٹ مارٹم کرانے کا حکم بھی دیا گیا ہے۔ حکام کے مطابق یہ اسپین میں لائیو آن لائن چیلنج کے دوران پیش آنے والی پہلی ہلاکت ہو سکتی ہے۔
سرجیو جیمنیز کو شہرت اس وقت ملی جب وہ اسٹریمر سائمن پیریز کی ویڈیوز میں نظر آئے، جو لائیو اسٹریمنگ کے دوران منشیات کے استعمال کے لیے جانے جاتے ہیں۔
