وزیر اطلاعات سندھ شرجیل میمن نے وزیراعلی خیبر پختونخوا کے دورہ کراچی کا خیرمقدم کرتے ہوئے کہا ہے کہ سہیل آفریدی سندھ میں سیاسی سرگرمیوں کیلئے آنا چاہتے ہیں تو خوش آمدید کہیں گے، بحیثیت وزیراعلی انہیں پروٹوکول دیا جائے گا۔
کراچی پریس کلب میں نئے عہدیداران کو مبارکباد پیش کرنے کے بعد میڈیا سے گفتگو میں شرجیل میمن نے کہا کہ وزیراعلی خیبرپختونخوا کو سندھ میں آئین و قانون کے دائرے میں تمام سرگرمیوں کی اجازت ہوگی، پی ٹی آئی سے سنگین اختلافات اپنی جگہ لیکن کوئی مہمان بن کر آرہا ہے تو ویلکم کریں گے، ان سے ہاتھ ملانے نہیں جارہے ہمیں ان کی طرز سیاست اور طرز حکمرانی پر اعتراضات ہیں۔
انہوں نے کہا کہ پیپلز پارٹی کی اولین ترجیح صحت کا شعبہ ہے، ہماری صحت کی سہولتیں دنیا کے کسی بھی ملک سے مقابلے کیلئے تیار ہیں۔
انہوں نے کہا کہ ماضی میں بھی پیپلز پارٹی ہمیشہ صحافیوں کے ساتھ تعاون کرتی آئی ہے، اب بھی صحافیوں کو درکار ہر مدد فراہم کرتی ہے، ہم مستقبل میں بھی صحافیوں کی ضروریات کا خیال رکھیں گے ۔
